Qytaimen birlesken jobalardy iske asyrý aiasynda 20 myńǵa jýyq jańa jumys oryndary qurylatyn bolady, onyń 95%-ynda qazaqstandyqtar jumys isteidi. Qalǵan 5% - túrli elderden kelgen mamandar, onyń ishinde - Kanada, Qytai t.b. elderden kelgender. Bul týraly Úkimettiń baspasóz ortalyǵynda ótken baspasóz konferentsiiasynda QR Premer-Ministriniń orynbasary Jeńis Qasymbek aitty, dep habarlaidy "Ult aqparat".
Onyń aitýynsha, usynylǵan investitsiialyq jobalardan basymdyq qazaqstandyq qamtýy joǵary, QR azamattary úshin barynsha kóp jumys oryndaryn qurýdy qamtamasyz etetin joǵary tehnologiialyq jobalarǵa beriledi. J. Qasymbek birlesken qazaqstandyq-qytailyq jobalar jańa jobalar ekenin, aldaǵy 5-6 jylda barlyǵy iske asyrylatynyn jetkizdi.
«Osy zaýyttar, jańa jobalar Qazaqstan aýmaǵyna kóshiriletin “taza emes”, eski jobalar degen sipatta áńgimeler aitylyp júr. Resmi túrde málimdeimin: eshqandai eski zaýyt nemese Qazaqstan aýmaǵyna kóshiriletin zaýyt joq. Bul jobalardyń barlyǵy - jańa jobalar», — dedi J. Qasymbek.
Onyń aitýynsha, jýyrda ǵana Qapshaǵai mańynda balamaly energetika elektr stantsiiasy ashyldy (kún energetikasy), onda 30 adam jumys isteidi, olardyń barlyǵy — Qazaqstan azamattary.
«Bul balamaly energetika – asa jańa joba. Biz birtindep oǵan kóshetin bolamyz. Qazaqstanda jyl sońyna deiin jel men kún esebinen 1000 megavatt qýat óndiriletin bolady. Bul álemdik betalystan biz bas tarta almaimyz. Barlyq aqparat ǵalamtorda, IIDM saitynda bar. Bul jerde eshqandai qupiia joq. Taǵy da aita ketkim keledi, bul – jańa tehnologiialar, bir eldiń aýmaǵynan ekinshi eldiń aýmaǵyna kóshiriletin eshqandai “taza emes” nemese eski kásiporyndar joq. Barlyq jobalar jańa. Jalpy, biz osy kásiporyndar jumysy aiasynda 20 myńǵa deiin jańa jumys oryndaryn qurýdy josparlap otyrmyz», — dep túsindirdi QR Premer-Ministriniń orynbasary.
J. Qasymbektiń málimdeýinshe, búginde 15 Qazaqstan – Qytai jobasy iske asyrylǵan, jyl sońyna deiin taǵy 5 joba júzege asyrylmaq.
«Atalǵan jobalardyń elimizde qolǵa alynǵanyna birinshi jyl bolyp turǵan joq. Búginde 15 joba iske asyrylǵan. 20-ǵa jýyq joba belsendi iske asyrylý satysynda tur. Sońǵy jyldary qytailyq investitsiialar úlesi bir deńgeide saqtalyp tur – 5-6%. Esh ózgeris bolmady», — dep ol, jobalar mashina jasaý, ónerkásip, kólik, agroónerkásip kesheni, energetika salalarynda iske asyrylyp jatqanyn atap ótti.
Budan ózge, J. Qasymbek ekologiialyq talaptarǵa sai kelmeitin bir de bir zaýyt Qazaqstanda salynbaitynyn aitty.
