Eýropadaǵy qaýipsizdik jáne yntymaqtastyq uiymynyń (EQYU) Bas hatshysy, nemis diplomaty Helga Mariia Shmidt Qazaqstannyń uiym aiasyndaǵy belsendiligin jaqsy baǵalaitynyn aitty, dep habarlaidy QazAqparat.
Óziniń Twitter-degi resmi akkaýntynda EQYU-nyń Bas hatshysy Qazaqstan astanasynda 19 aqpan kúni Astana Sammitiniń 10 jyldyq mereitoiyna orai atalyp ótken «Astanadaǵy EQYU-2010 sammitiniń tarihi máni men ózektiligi» atty halyqaralyq onlain konferentsiiasynda jiynǵa qatysýshylarǵa quttyqtaýyn joldady.
Helga Mariia Shmid Qazaqstannyń EQYU aiasyndaǵy belsendiligin baǵalaitynyn, memlekettiń Eýropa men Aziia arasynda kópir ispettes ekenin atap ótti.
«Qazaqstannyń 2010 jylǵy EQYU-daǵy tóraǵalyǵy men Astana Sammiti osy eldiń uiym aiasyndaǵy jumysynyń jarqyn sátteriniń biri boldy. Astana Sammiti aiasyndaǵy atqarylǵan jumystar EQYU-ǵa múshe elderdi naǵyz qaýipsizdik qoǵamdastyǵyn qurý jolynda jumysty jalǵastyrýǵa mindetteidi. Men Qazaqstannyń osy úderis barysynda áli de mańyzdy ról atqaratynyna senimdimin»,-dep jazdy ol.
Sonymen qatar EQYU-nyń Bas hatshysy Qazaqstandy Táýelsizdiktiń 30 jyldyǵymen quttyqtady.
Aita keteiik, búgin Qazaqstan astanasy Nur-Sultanda onlain rejimde «Astanadaǵy EQYU-2010 sammitiniń tarihi máni men ózektiligi» halyqaralyq konferentsiia ótti.
Sharany Qazaqstannyń Tuńǵysh Prezidenti, Elbasy kitaphanasy QR Syrtqy ister ministrligi men EQYU-nyń Nur-Sultandaǵy Baǵdarlamalar keńsesimen birlesip uiymdastyrdy.
