.jpeg)
Bul týraly Parlament Májilisiniń Tóraǵasy Erlan Qoshanovpen kezdesýinde Eýropadaǵy qaýipsizdik jáne yntymaqtastyq uiymynyń qazirgi tóraǵasy, Polsha Respýblikasynyń Syrtqy ister ministri Zbignev Raý málimdedi, dep habarlaidy "Ult aqparat".
Raý Qazaqstan Prezidenti Qasym-Jomart Toqaevtyń Konstitýtsiialyq reformalaryn iske asyrý nátijesinde Parlamenttiń róli kúsheietinin atap ótti.
– Qazaqstandy aýqymdy saiasi reformalardy júzege asyrýda bizdiń Uiym men EQYU Baǵdarlamalar ofisiniń barlyq resýrsy pen tájiribesin tolyq paidalanýǵa shaqyrǵymyz keledi, – dedi EQYU tóraǵasy.
Zbignev Raý Qazaqstanǵa EQYU-nyń qaita sailanǵan tóraǵasy retinde óńirmen tanysýǵa arnalǵan sapary aiasynda arnaiy keldi. Sonymen qatar onyń Ózbekstan men Monǵoliiaǵa da sapary josparlanýda.
Erlan Qoshanov EQYU tóraǵasynyń sapary Qazaqstan úshin mańyzdy saiasi oqiǵa – referendým qarsańynda ótip jatqanyn atap ótti. Májilis Spikeri muny Memleket basshysynyń reformalary men jalpyhalyqtyq referendýmdy qoldaýynyń dáleli dep sanaidy.
Kezdesý barysynda taraptar Qazaqstan men EQYU-nyń ózara is-áreketiniń, Qazaqstan-Polsha ekijaqty qatynastarynyń, sonyń ishinde eki el parlamentteri arasyndaǵy bailanystyń qazirgi jaǵdaiy men keleshegin talqylady.
Raý ótken ǵasyrdyń 30 jyldaryndaǵy saiasi qýǵyn-súrgin kezinde Qazaqstanǵa jer aýdarylǵan ondaǵan myń poliaktarǵa qoldaý kórsetip, pana bolǵany úshin qazaq halqyna alǵysyn aitty. Sondai-aq ol Qazaqstanda turatyn etnikalyq poliaktardyń tól mádenieti men tilin úirenýine barlyq jaǵdai jasalǵany úshin rizashylyǵyn bildirdi.
Kezdesý qorytyndysy boiynsha taraptar barlyq deńgeidegi yntymaqtastyqty odan ári keńeitý týraly kelisti.
