Rýdnyi qalasynda ekstremistik ádebiet saqtap, áleýmettik jelide teris aqparat taratyp kelgen 59 jastaǵy turǵyn ustaldy, dep habarlaidy "Ult aqparat".
Rýdnyi turǵyny dini alaýyzdyqty qozdyrýǵa baǵyttalǵan kitapty úiinde saqtaǵan. Bul ádebietti Aqtóbe sotynyń 2012 jylǵy sheshimimen elimizge ákelýge jáne taratýǵa tyiym salynǵan. Sonymen qatar ol «WhatsApp» messendjeri arqyly ekstremistik materialdar taratqan. Dintaný saraptamasynyń qorytyndysyna sáikes, bul habarlamalardyń dinaralyq alaýyzdyqty qozdyrýǵa baǵyttalǵany anyqtaldy.
Rýdnyi qalasynyń mamandandyrylǵan ákimshilik soty atalǵan azamatty kináli dep tanydy. Jasalǵan quqyq buzýshylyqtar úshin ol 300 myń teńgeden astam aiyppul tóleýi tiis. Sot sheshimi zańdy kúshine endi.
Jalpy 2020 jyly oblystyq politsiia departamentiniń ekstremizmge qarsy is-qimyl basqarmasynyń qyzmetkerleri dini qatynastar salasynda 13 ákimshilik quqyq buzýshylyqty tirkedi. Sot 9 adamǵa 1,9 mln teńgeden (700 AEK) astam aiyppul salyp, ákimshilik jaýapqa tartty.
Oblystyq PD Ekstremizmge qarsy kúres basqarmasynyń bastyǵy Erbol Derbisovtyń aitýynsha, zańsyz derekterdiń deni internet jelisinde jasalǵan.
«Jalǵan dini uiymdardyń jaqtaýshylary óz materialdaryn taratý úshin ártúrli messendjerlerdi jii qoldanady. Dini materialdardy taratqany úshin zańnamada ákimshilik jáne qylmystyq jaýapkershilik qarastyrylǵan. «Dini qyzmet jáne dini birlestikter týraly» QR Zańynyń 9-babyna sáikes, dini ádebietti, dini mazmundaǵy ózge de aqparattyq materialdardy tek ǵibadat ǵimarattarynda, rýhani (dini) bilim berý uiymdarynda, sondai-aq arnaiy statsionarlyq úi-jailarda taratýǵa jol beriletinin eske salamyz», - deidi E.Derbisov.
