Búgin QR Úkimetiniń baspasóz ortalyǵynda ótken brifingte indýstriia jáne infraqurylymdyq damý ministri Jeńis Qasymbek shikizattyq emes eksportty ilgeriletý boiynsha qabyldanyp jatqan sharalar men ekonomikanyń ónerkásiptik sektoryn tsifrlandyrý barysy týraly aityp berdi, dep habarlaidy "Ult aqparat".
Indýstriia jáne infraqurylymdyq damý ministrligi Memleket basshysynyń tapsyrmalaryn iske asyrý boiynsha, sondai-aq indýstriialandyrý men «Nurly jer», «Nurly jol» baǵdarlamalary aiasynda júieli jumystar júrgizip jatyr.
J. Qasymbek negizgi metaldarǵa qatysty álemdik baǵanyń tómendeýine, negizgi saýda áriptesterine qatysty sanktsiialarǵa jáne basqa da syrtqy faktorlarǵa qaramastan, 2018 jyldyń qorytyndysy boiynsha ónerkásip 4,1%-ke óskenin aitty. Bul taý-ken sektorynyń 4,6%-ǵa jáne óńdeýshi ónerkásiptiń 4%-ǵa ozyq qarqynmen ósýi esebinen oryndaldy. Negizgi draiverler — mashina jasaý, himiia ónerkásibi, munai óńdeý, jeńil ónerkásip jáne munai men gaz óndirý salalary.
«2018 jyldyń qorytyndysy boiynsha óńdeýshi ónerkásipte jumys istep turǵan kásiporyndardyń sany 14,7 myńǵa jetti. Jalpy alǵanda ónerkásip boiynsha eńbek ónimdiligi 3,5%-ǵa, negizgi kapitaldaǵy investitsiialar – 27%-ǵa ósti», — dedi ministr.
Indýstriialandyrý baǵdarlamasyn iske asyrý kezeńinde jalpy quny 7,9 trln teńge bolatyn 1250-den astam joba iske qosylyp, 120 myń turaqty jumys orny quryldy. Al, 2018 jyly quny 1,3 trln teńge bolatyn 100 jańa joba iske qosylyp, 13 myńnan astam turaqty jumys orny quryldy.
2019 jyly jalpy somasy 1,1 trln teńge bolatyn 120-ǵa jýyq kásiporyndy iske qosý josparlanyp otyr. Bul jobalar boiynsha 20 myń turaqty jumys orny qurylady.
Shikizattyq emes eksportty ilgeriletý boiynsha qabyldanǵan sharalardyń arqasynda 2018 jyldyń 11 aiynyń qorytyndysy boiynsha eksport kólemi 24%-ǵa ósip, $54,7 mlrd qurady, onyń ishinde óńdelgen ónimder eksporty $14,3 mlrd jetti. 2018 jyly qazaqstandyq ónim 119 elge eksporttaldy.
Aldaǵy úsh jylda (2019–2021 jj.) salaǵa qosymsha 500 mlrd teńge bólinip, bul shikizattyq emes eksportty damytýǵa jańa serpin beredi. Bul 2021 jylǵa qarai óńdeýshi ónerkásip ónimderiniń eksportyn 720 mlrd teńgege deiin, eksporttaýshylar sanyn 411-den 600 sýbektige deiin arttyrýǵa múmkindik beredi.
«Tsifrlyq Qazaqstan» memlekettik baǵdarlamasy aiasynda 2022 jylǵa qarai óńdeý ónerkásibi men taý-ken metallýrgiia kesheniniń (TKMK) 100-den astam kásipornynda innovatsiialyq jáne tsifrlyq tehnologiialardy engizý kózdelgen.
«Biyl TKMK, himiia, qurylys jáne azyq-túlik salasynyń 32 kásipornynda innovatsiialyq jáne tsifrlyq tehnologiialardy engizýge qatysty 38 joba iske asyrylady», — dedi J. Qasymbek.
Ótken jyly Indýstriialyq damýdyń úshinshi baǵdarlamasyn ázirleý jumystary bastaldy. Ministrdiń aitýynsha, jańa indýstriialyq saiasat 2025 jylǵa qarai óńdeý ónerkásibinde (2016 jylǵy deńgeimen salystyrǵanda): eńbek ónimdiliginiń naqty ósimi — 1,7 ese, shikizattyq emes eksporttyń qundyq kóleminiń ósimi — 2,3 ese, óńdeý ónerkásibiniń negizgi kapitalyna salynǵan investitsiialardyń naqty ósimi — 2 ese.
