Astanaǵa qydyryp kelgen kongolyq Monika Kamganza týǵan jerine orala almai júr, dep habarlaidy "Ult aqparat" «Habar 24» telearnasyna silteme jasap.
Málim bolǵandai, Monika Qazaqstanǵa byltyr EKSPO kórmesine kelgen. Osynda er azamatpen tanysyp, biraz ýaqyttan keiin onymen qarym-qatynasyn úzgen. Qazir qolynda kishkentai sábii bar. Al viza merzimin uzartý kerektigin bilmegen. Osylaisha, qazir ol úi-kúisiz qalyp otyr. Onyń ústine, kongolyq azamatshanyń tek frantsýz tilinde sóileýi onymen tildesýdi qiynǵa soqtyrýda.
Kámelettik jasqa tolmaǵandar jónindegi inspektsiia Monikany áleýmettik-quqyqtyq qorǵaý ortalyǵyna jibergen. Olar sábidiń ómirge kelýine kómektesken.
«Eger migratsiialyq politsiia ony vizalyq rejimdi buzǵany úshin elden ketýge májbúrlese, onyń jolaqysyn eshkim de ótei almaidy. Bul úlken qarajat, al azamatshanyń bir tiyny da joq. Ol Qazaqstanda qalýǵa kómek surap otyr. Munyń joly bar. Biri - yqtiiarhat alý. Alaida onyń esepshotynda 3 mln teńgesi bolýy tiis. Ne bosqyn mártebesin alý. Bul da kúrdeli másele», - deidi qor direktory Anna Ryl.
