- Ádettegi sársenbiniń jumys kúnin «EKSPO kórmesiniń aýmaǵynda ǵimarat qulady» degen aqparat astań-kesteń etti. Árine, elimizdiń endigi jylǵa josparlap otyrǵan basty jobasy bolǵandyqtan, bul tótenshe jaǵdai búkil buqaralyq aqparat quraldary men halyqty dúr silkindirdi.
«Astana EKSPO-2017» ulttyq kompaniiasy men osy qulaǵan dekorativti konstrýktsiiaǵa jaýapty BI Group kompaniiasy resmi túrde kommentarii berip úlgerdi. EKSPO kompaniiasynyń baspasóz qyzmeti habarlaǵandai, konstrýktsiia qulaǵan kezde, oqiǵa ornynda eshkim bolmaǵan jáne zardap shekkender joq. Al BI Group kompaniiasy jobaǵa qatysty tergeý bastalǵanyn habarlap, qulaǵan konstrýktsiia tek dekorativti sipatqa ie ekenin jáne ol eki jaǵyndaǵy pavilonǵa eshqandai ziian tigizbegenin jetkizdi.
Oqiǵa ornyna jedel járdem shaqyrylǵan soń, QazAqparat tilshisi qalalyq densaýlyq saqtaý basqarmasyna da habarlasty. Ol jaqtyń baspasóz qyzmeti zardap shekken bir jigit týraly aqparat taratqan bolatyn. Biraq, «Astana EKSPO-2017» ulttyq kompaniiasynyń qoǵamman bailanys jónindegi departamentine jetekshilik etip otyrǵan Sergei Kýianovtyń aitýynsha, ol jigit aiaǵyn múlde basqa jerde qaiyryp alǵan eken.
«Túsindireiin. Jedel járdem Tótenshe jaǵdailar qyzmetiniń hattamasy boiynsha keldi. Jedel járdem kelgen kezde konstrýktsiia qulaǵan orynda zardap shekken birde-bir adam bolǵan joq. Keiin, qurylys aýmaǵyndaǵy bir jigit jedel járdemge kelip, aiaǵyn basqa jerge qaiyryp alǵanyn habarlady. Jedel járdem ony EKSPO aýmaǵynan alyp ketkeni ras, biraq ol osy búgin qulaǵan konstrýktsiianyń janynda zardap shekken adam emes», - dedi telefon arqyly S.Kýianov.
«Degenmen, densaýlyq saqtaý basqarmasynyń habarlaýynsha, ol qaýipsiz jerge qashyp úlgermepti ǵoi?» degen suraǵymyzǵa ol: «Ózińiz elestetip kórińizshi, bul konstrýktsiianyń salmaǵy 320 tonna. Eger osy 320 tonna adamnyń aiaǵyna qulap ketse, ne bolar edi? Elestetip kórińizshi. Maǵan áriptesterim aitqandai, ol aiaǵyn basqa jerde qaiyryp alyp, jedel járdemge ózi júrip kelgen. Ol qashyp úlgermedi jáne oǵan konstrýktsiianyń bir bóligi tiip ketti deidi, biraq shamamen 25 metr biiktiktegi 320 tonnalyq konstrýktsiianyń bir bóliginiń ózi adamnyń aiaǵyna tise, tizesi ǵana aýyrmaityn shyǵar. Eger shynymen solai bolsa, adam óz aiaǵymen jedel járdemge bara almaityn edi», - dedi Kýianov.
Al «bul tótenshe jaǵdaiǵa qatysty kompaniianyń basqarma tóraǵasy Ahmetjan Esimov komentarii bere ma?» degen suraǵymyzǵa ol: «Ondai jumys úshin túgeldei bir departamenti bar, sondyqtan tóraǵa pikir bildirmeidi», - dep jaýap berdi.
