Qaraǵandy oblystyq tarihi-ólketaný mýzeii Joshy Ulysynyń 800 jyldyǵyna arnalǵan «Talas-Ulytaý-Saraishyq» atty respýblikalyq tarihi-etnografiialyq ekspeditsiiany uiymdastyrdy. Keshe bir top tarihshy-ǵalym, ekspeditsiia qatysýshylary jolǵa shyǵyp, Tarazǵa jetti, dep habarlaidy "Ult aqparat".
«Ekspeditsiia marshrýty boiynsha Jambyl, Ulytaý, Qyzylorda, Aqtóbe, Túrkistan jáne Atyraý oblystarynyń arheologiialyq, arhitektýralyq eskertkishterin tolyq kólemde zerdeleý Joshy Ulysy men Altyn Orda dáýirindegi Qazaqstan tarihyn zertteýge jan-jaqty qaraýǵa múmkindik beredi», — deidi oblystyq oblystyq mádeniet, muraǵattar jáne qujattama basqarmasynyń basshysy Erkebulan Jumakenov.
Ekspeditsiia quramynda elimizdegi tarihshy-ǵalymdardan bólek baýyrlas Túrkiia elinen kelgen arheolog Choban Akaial, etnolog, M.Ammosov atyndaǵy Soltústik-Shyǵys federaldy ýniversitetiniń magistranty, Altyn Orda tarihyn zertteýshi, tarihshy, Resei Federatsiiasynan kelgen Saina Mihailova sekildi alys jaqyn shet elden kelgen tarihshylar bar. Bul degenimiz ekspeditsiianyń keń aýqymyn kórsetedi.
«Ekspeditsiia barysynda Joshy Ulysynyń tarihymen bailanysty arheologiialyq, arhitektýralyq, memorialdyq nysandardyń qazirgi jaǵdaiyna baqylaý júrgiziledi, týristik baǵytty arttyrý boiynsha usynystar ázirlenedi, foto, beine, aýdio formatta tanymdyq aqparattyq ónimder daiyndalady. Ǵalymdar, tarihshylar men mamandardyń suhbaty negizinde derekti film túsirilip, halyqqa usynylady», — deidi oblystyq tarihi-ólketaný mýzeiiniń basshysy Erjan Nurmaǵanbetov.
Joshy Ulysynyń 800 jyldyǵyna arnalǵan «Talas-Ulytaý-Saraishyq» respýblikalyq tarihi-etnografiialyq ekspeditsiialyq kóshi 20 qyrkúiek – 1 qazan aralyǵynda jolda bolady.
Ekspeditsiia búgin «Tekturmas» Etno-tarihi kesheni, Ejelgi Taraz álemi qalashyǵy, Qarahan kesenesi, Jánibek-Kerei handarynyń eskertkishi, Aisha bibi kesenesine barady.
