Munai urlaýmen ainalysqan qylmystyq toptyń jetekshisi Erkin Izbasarov Aqtóbege jetkizildi. «Aǵaiyndy tórteý» degen laqap atpen tanymal qylmystyq toptyń serkesin endi osynda tergeitin boldy. Tergeý málimeti boiynsha, ol jat aǵymnyń jeteginde ketken jigitterdi qaraqshylyq úshin paidalanǵan. Solardyń biri búgin ustaldy. Sondai-aq, qaýipsizdik komitetindegiler Temir aýdanyndaǵy munai óndiretin zaýyttardy tintip shyǵypty.
- Qara altyn urlaýmen ainalysqan qylmystyq top múshelerin ustaý uzaqqa sozylatyn siiaqty. Ulttyq qaýipsizdik komiteti men jemqorlyqqa qarsy kúres biýrosy ókilderi tańnan beri taǵy da shapqylap júr. Aimaqtaǵy ásiredinshilerdi qarjylai qoldap otyrǵandardy jańa jylǵa deiin tazartyp bolý kerek degen buiryq túsken.
Aqtóbedegi halyqaralyq áýejai ǵimaratynyń janyndaǵy qosalqy qaqpa tústen keiin qorshaýǵa alyndy. Qadirli qonaqty kútkendei sarbazdar ushaq alańynda sap túzep tur. Degenmen, áýe joly arqyly laýazymdy tulǵany emes, elimizdegi «Aǵaiyndy tórteý» degen laqap atpen tanymal qylmystyq toptyń serkesi 50 jastaǵy Erkin Izbasarovty Almatydan jetkizdi. Ol úshin ulttyq qaýipsizdik komitetine qarasty shekara qyzmetiniń ushaǵyn arnaiy bólgen. Qara altyn urlaýmen ainalysqan qaraqshylardyń arbaǵa tańylǵan basshysy kóp sózge joq. Bet-júzin jasyryp álek boldy.
Erkin Izbasarovpen birge onyń kólik júrgizýshisi men oqqaǵary da qazir Aqtóbede. Endi olardy munai urlyǵyna qatysty osynda tergeitin bolady. Belgili bolǵanyndai, Izbasarov aimaqtaǵy jat aǵymnyń jeteginde ketken jigitterdi óz paidasyna jumsap otyrǵan. Salafizm aǵymyn ustanǵan sybailastarynyń biri búgin ustaldy.
Qylmystyq top múshelerin ustaý Temir aýdanynda jalǵasty. Shubarqudyq aýylynda qara altyndy tasymaldaýmen ainalysqandardyń biri tutqyndaldy. Ol da radikaldyq dini kózqarasta eken. Urlanǵan munaidan túsken aqshalaryn basshylarymen bólisip, qalǵanyn ásiredinshilerdi qoldaýǵa jumsap otyrǵan. Aita ketelik, operatsiia ótken Temir aýdanynda jat aǵymnyń jeteginde ketkender azaimai otyr. Osydan bes jyl buryn radikaldar dál osy aýdanda bas kótergen bolatyn. Shubarshi aýylynda ekstremister tártip saqshylarymen atysyp, eldi úreide ustaǵan edi.
