Eksimbank Qazaqstan» AQ-ny májbúrlep taratý týraly sot sheshimi zańdy kúshine endi, dep habarlaidy "Ult aqparat" QR Ulttyq bankiniń baspasóz qyzmetine silteme jasap.
«16 qańtarda Almaty qalalyq soty Almaty qalasynyń Mamandandyrylǵan aýdanaralyq ekonomikalyq sotynyń «Eksimbank Qazaqstan» AQ-ny májbúrlep taratý týraly 2018 jylǵy 28 qarashadaǵy sheshimine «Qazaqtelekom» AQ-nyń shaǵymyn qanaǵattandyrýsyz qaldyrdy. Osylaisha, MAES-tyń «Eksimbank Qazaqstan» AQ-ny májbúrlep taratý týraly 2018 jylǵy 28 qarashadaǵy sheshimi 2019 jylǵy 16 qańtarda zańdy kúshine endi», - delingen habarlamada.
Ulttyq banktiń málimetinshe, jeke tulǵalar men jeke kásipkerlerge «Eksimbank Qazaqstan» AQ-daǵy salymdarǵa, aǵymdaǵy shottarǵa jáne tólem kartalaryna ornalastyrylǵan aqsha óteledi. Ótemaqy «Qazaqstannyń depozitterge kepildik berý qory» AQ-nyń (QDKQ) qarajatynan jinaqtalǵan syiaqyny eskere otyryp, biraq depozitter boiynsha kepildiktiń eń kóp somasynan aspaityndai salymnyń, bank shotyndaǵy nemese tólem kartasyndaǵy aqsha qaldyǵynyń somasy sheginde tólenetin bolady (teńge depozitteri- 10 mln teńge, shetel valiýtasyndaǵy depozitter - 5 mln teńge, bir salymshynyń bir ýaqytta teńge jáne shetel valiýtasyndaǵy depozitteri boiynsha - 15 mln teńge).
Eskerte keter jait, shetel valiýtasyndaǵy depozitter boiynsha ótemaqy teńgemen tólenedi. Ótemaqy somasyn esepteýde 2019 jylǵy 16 qańtardaǵy naryqtyq aiyrbastaý baǵamy qoldanylady. Zańǵa sáikes kepildik qorynan depozitter boiynsha kepildi ótemaqy «Qazposhta» arqyly tólenetin bolady.
«Eksimbank Qazaqstan» AQ-nyń salymshylarynan ótinish qabyldaý jáne ótemaqy tóleý alty ai ishinde - 2019 jylǵy 4 aqpannan bastap 4 tamyz aralyǵynda júrgiziledi.
Aita keterligi, 2019 jylǵy 4 tamyzǵa deiin «Qazpochta» AQ-qa júginbegen salymshylar agenttik kelisimniń qoldanylýy aiaqtalǵannan keiin QDKQ-qa tikelei tiisti ótinish bere otyryp, ótemaqy alýǵa quqyly.
Sondai-aq, ótemaqy alý tártibi týraly, sondai-aq ótinishter qabyldanatyn «Qazposhta» bólimsheleriniń mekenjaiy týraly aqparat qosymsha jariialanatyn bolady.
