Búgin Shymkent qalasynyń túrmesinde jazasyn ótep jatqan Qýandyq Bishimbaev bostandyqqa shyqty. Burynǵy Ulttyq ekonomika ministrin merziminen buryn bosatý týraly qaýlyny Abai aýdandyq sotynyń sýdiasy Marat Sháripov shyǵarǵan, dep habarlaidy "Ult aqparat".
Atalǵan sottyń baspasóz qyzmetiniń málimetinshe, Qýandyq Bishimbaev Qylmystyq protsessýaldyq kodekstiń 72-baby boiynsha jazasyn ótep jatqan.
«Ol jazasyn óteý merziminiń ekiden bir bóligin ótep qoiǵan jáne 167/3 túzeý mekemesiniń basshylyǵy oǵan jaqsy minezdeme bergen. Osy jaittardy eskergen sýdia Qylmystyq protsessýaldyq kodekstiń 476, 480 jáne 483 baptaryn negizge ala otyryp, sottalǵan Bishimbaevty 1 jyl 3 ai 13 kún buryn bosatý týraly qaýly qabyldaǵan» delingen baspasóz qyzmetiniń habarlamasynda.
Aita keteiik, bul qaýly 25 qyrkúiek kúni qabyldanyp, keshe 10 qazan kúni kúshine engen. Osy qaýlyǵa orai búgin Qýandyq Bishimbaev túrmeden bosap, bostandyqqa shyqty.
Eske sala ketsek, buǵan deiin sottalǵan ministrdiń qorǵaýshysy onyń jazasyn óteý tártibin ózgertýdi suraǵan bolatyn.
Aita ketsek, ótken jyldyń naýryz aiynda burynǵy ulttyq ekonomika ministri men osy iske qatysty ózge de aiyptalýshylarǵa sot úkimi shyqqan edi. Sot úkimimen Qýandyq Bishimbaevtiń múlki tárkilenip, 10 jylǵa sottaldy. Sonymen birge, ol ómir boiyna memlekettik qyzmette jumys isteý quqyǵynan aiyryldy. Biylǵy 4 qańtar kúni Qýandyq Bishimbaev Shymkenttegi qaýipsizdigi ortasha túzeý mekemesine aýystyrylǵan bolatyn.
Tergeý materialdaryna sáikes, Bishimbaev Qyzylorda qalasyndaǵy shyny zaýytynyń qurylysyna jaýapty bolǵan. Sol kezde onyń inisi Sultan Nurlybek 2 million dollar kólemindegi para alýǵa deldaldyq jasaǵan.
Bostandyqtaǵy Bishimbaevtyń sýretin Instagram-da Sanjar Altaev esimdi qoldanýshy jariialady.
