Atyraý qalasynyń №2 sotynda Maqat aýdanynyń burynǵy ákimi Rinat Ibragimovke qatysty qylmystyq is qaraldy, dep habarlady "Ult aqparat".
Sotta anyqtalǵandai, 2023 jylǵy 31 mamyrda Atyraý qalasyndaǵy páterinde sottalýshy men onyń áieli arasynda janjal bolǵan.
"Eks-ákim jábirlenýshiniń ózine materialdyq táýeldiligin paidalanyp, osynyń negizinde janjal shyǵaryp, áieliniń oń iyǵynan ustap, esikti jaýyp, bólmege kirgizgen. Eshkimniń kedergi jasamaitynyna kóz jetkizip, densaýlyǵyna qasaqana ziian keltirý maqsatynda ony edenge qulatqan jáne sol jaq sanynan birneshe ret tepkilegen. Sonyń saldarynan jábirlenýshiniń 5-shi omyrtqasy synyp, ortasha aýyrlyqta zaqym alǵan", – delingen is materialdarynda.
Sottalýshynyń kinási jábirlenýshiniń aiǵaqtarymen, saraptama qorytyndysymen jáne basqa da aiǵaqtarmen dáleldendi.
Sotpen jaza túrin tańdaý kezinde Rinat Ibragimovtiń buryn sottylyǵy joqtyǵy, minezi oń sipattalǵany eskerildi. Sot úkimimen oǵan 2 jylǵa bas bostandyǵyn shekteý jazasy taǵaiyndaldy, – delingen habarlamada.
Sondai-aq jábirlenýshiniń 20 mln teńge moraldyq shyǵyn óndirý týraly azamattyq talap qoiýy ishinara qanaǵattandyrylyp, eks-ákim burynǵy áieliniń paidasyna 2 mln teńge moraldyq ziiandy óteitin boldy.
Sottyń úkimi zańdy kúshine engen joq.
Eske sala ketsek, buǵan deiin áieli zábir kórgenin aitqan Maqat aýdanynyń ákimi qyzmetinen ketkenin habarlaǵan bolatynbyz. Ol bul laýazymyna 2022 jylǵy naýryzda taǵaiyndalǵan. Bul taǵaiyndaýǵa deiin Atyraý oblystyq dene shynyqtyrý jáne sport basqarmasynyń basshysy bolǵan.
Onyń burynǵy áieli zábir kórgenin aitqan videosy áleýmettik jelide tarady.
