Elimizde koronavirýsqa qarsy vaktsina alýǵa qarsy adamdardyń úlesi azaiyp keledi. Bul týraly QR Densaýlyq ministri Aleksei Tsoi málim etti, dep habarlaidy QazAqparat agenttigi.
«Taiaýda «koronavirýsqa qarsy vaktsina alýdy mindettemeńizder» dep talap qoiǵandar boldy. Meniń aitarym, Qazaqstanda vaktsina alý mindetti emes, eshkimdi májbúrlemeidi. Ekpe alǵyńyz kelmese erik ózińizde, sizge eshkim qinap vaktsina salmaidy. Al revaktsinatsiiaǵa kelsek, ol qaita ekpe alyp, immýnitetimdi kúsheitemin deýshilerge arnalyp otyr. Bul áńgime balalar vaktsinasyna da qatysty. Ata-ananyń óz erkinde», - dedi Tsoi Úkimet úiinde tilshilerdiń suraǵyna jaýap bere tura.
Onyń aitýynsha, ministrlik halyqty vaktsina alýǵa májbirlemeidi, degenmen túsindirý jumysyn júrgizedi.
«Árine, vaktsina alýǵa qatysty túsindirý jumysy kerek. Onyń ústine qazir qoǵam belsendi, bizdiń kómegimizsiz de belsendiler túsindirip jatady. Al quzyrly organ retinde resmi derekterdi jinap, halyqqa usynyp, túsindirý – bizdiń mindetimiz. Taǵy bir baiqaǵanymyz sońǵy ýaqytta vaktsina alýǵa qarsy shyǵýshylardyń sany azaiyp keledi. Buryn jii tuǵyn. Bul másele boiynsha bizde monitoring jasap, qadaǵalap otyrmyz. Demek qoǵamnyń kózi jetti degen sóz. Búginde qazaqstandyqtardyń 70 paiyzdan astamy koronavirýsqa qarsy vaktsina aldy. Ekpe alýdy synaǵan qaýymnyń basym kópshiligi qazirgi kúni vaktsina alǵan», - deidi ol.
