Foto: Spikerdiń jeke arhivinen
Atyraýda III Ulttyq quryltai ótti. Memleket basshysy Qasym-Jomart Toqaevtyń tóraǵalyǵymen ótken «Adal adam – Adal eńbek – Adal tabys» atty jiynǵa barlyq óńirden kelgen quryltai músheleri qatysty. Ult.kz portalyna Ekonomikalyq zertteýler institýty Aimaqtyq zertteýler ortalyǵynyń jetekshi sarapshysy Shynar Pazylbekqyzy quryltaida kóterilgen máselelerdi aityp berdi.
Spikerdiń aitýynsha, quryltaidyń Atyraý qalasynda ótýiniń de tarihi mańyzy zor kórinedi.
«Jalpy Ulttyq quryltai biyl úshinshi ret ótip otyr. Árine, bul úlken tarihi mańyzy zor oqiǵa. Osy úshinshi ret biyl Atyraý qalasy Ulttyq quryltai ótetin oryn retinde alyndy. Bul Jaiyqtyń jaǵasynda kezinde elimizdiń tarihynda úlken mańyzdy ári áleýmettik-ekonomikalyq ról atqarǵan Saraishyq qalasynyń orny dep Prezident Qasym-Jomart Toqaev Quryltai barysynda atap ótken bolatyn. Memleket basshysynyń aitýynsha, Quryltaidyń da Atyraý qalasynda ótýi jai emes», – deidi Shynar Pazylbekqyzy.
Onyń sózinshe, Quryltaida kóptegen másele qaralǵan. Ult retinde bizdiń mádenietimiz, dinimiz, tilimiz, qazirgi jastardyń arasynda kezdesetin problemalar, otbasyndaǵy zorlyq-zombylyq máselesi siiaqty máseleler jan-jaqty kóterilgen. Sonymen qatar, Prezident Qasym-Jomart Toqaev ekonomika máselesi boiynsha tórt infraqurylymdyq bastamany júzege asyrýdy tapsyrdy.
«Birinshiden, injenerlik infraqurylymdy jańartý, onyń ishinde jylý ortalyǵyn jóndeýden ótkizý, injenerlik júieni jańǵyrtý, kommýnaldyq qyzmettiń jalpy sapasyn kóterý siiaqty máseleler.
Ekinshi – bizde halyqtyń turmys jaǵdaiyn jaqsartýda úlken ról atqaratyn baspana máselesi. Iaǵni bul jerde halyqtyń barlyq áleýmettik osal toptary da osy baspana máselesinen qalys qalmaýy úshin nesie ósimin 7 paiyzdan aspaýy qajet ekenin tapsyrdy. Bul árine halyqtyń turmys jaǵdaiynyń jaqsarýyna áser etetin birden bir másele – baspanamen qamtý. Sonyń ishinde taǵy bir aita ketetin másele, baspana máselesi boiynsha, aýdan men aýyl turǵyndaryna jańa turǵyn úi baǵdarlamasyn qolǵa alý kerek dedi. Árine, bul óńirlerdiń damýyndaǵy, onyń ishinde ol aýdan ortalyqtary men kishigirim eldi mekenderdiń damýynda, olarda halyqtyń jaǵdaiynyń jaqsarýyna áser etetin nárse, olardyń da baspanamen qamtamasyz etilýi.
Úshinshi – jol salý jáne jóndeý jumystary. Óńirlerdiń arasynda, jalpy eldi mekenderdiń arasynda kólikpen qatynaýdyń edeýir jeńildeýine áser etetin baǵyt. Bul 12 myń shaqyrym avtokólik jolyn qamtidy dep Prezident atap ótti.
Tórtinshi – gaz tartý máselesi. Bul másele de bizdiń óńirler men eldi mekender ekonomikasynda úlken ról atqaratyn másele. Gaz tartylǵan eldi mekenderdiń sanyn barynsha arttyryp, 1700 shaqyrym gaz jelisin jańǵyrtýǵa tiis dep tapsyrma berdi. Iaǵni bul 300 myń adamnyń gazben qamtamasyz etýine múmkindik beredi eken. Sondyqtan osy tórt infraqurylymdy negizgi áleýmettik-ekonomikalyq baǵyttaǵy jalpy óńirlerdiń ekonomikalyq jaǵdaiyn jaqsartýdaǵy basty máseleler bolyp otyr», – deidi Ekonomikalyq zertteýler institýty Aimaqtyq zertteýler ortalyǵynyń jetekshi sarapshysy Shynar Pazylbekqyzy.
Sonymen qatar, Prezidenttiń ekonomika salasynda qoiǵan taǵy bir máselesi – kásipkerlikti damytý. Iaǵni kásipkerlik salasynda kásipkerdiń ulty emes, onyń azamattyq sana-seziminiń qalyptasýy kásipkerliktiń damýyna, kásipkerlerdiń el ekonomikasyn, áleýmettik jaǵdaiyn damytýǵa qosar úlesi zor ekenin atap ótti.
