Elordada qorshaǵan orta janashyrlary Esil ózeni sýynyń azaiyp bara jatqandyǵyna alańdaýshylyq bildirdi, dep habarlaidy QazAqparat.
«2020 jyldan bastap Esil ózeniniń sýy sapa jiktemesine sáikes 5-shi topqa jatady. 2016 jyly qabyldanǵan sheshimge sáikes, bizde sý sapasyna qarai 5 jikteme topqa bólinedi. Ol boiynsha alǵashqy 4 jiktemege jatatyn sýda adam shomylýǵa bolady, jaramdy. Aitpaqshy, Qazgidromettiń saitynda sý betiniń interaktivti kartasy bar. Ony kez kelgen adam qarap, tanysa alady. Ol kartada da Esil ózeni sýynyń sapasy jiktemeniń sońǵy satysynda tur. Sondyqtan Esil ózeninde shomylýǵa tyiym salyndy. Atalǵan ózenge qatysty ekinshi másele — onyń tartylyp, taiazdap bara jatqany. Bul — úlken másele. Odan bólek, ózen las. Moiyndaý kerek, bul adamnyń isi, qaldyq kóp tastalady. LRT-nyń qurylysy kezinde Esil ózenindegi Belasar kópiriniń janynda qurylys jáne basqa da qaldyq tastaldy, sonyń saldarynan jaǵymsyz iis paida boldy», - dedi praktikalyq ekologtar qaýymdastyǵynyń basshysy Laýrý Málikova.
Onyń aitýynsha, elimizdiń sý kodeksinde ózen mańynda salynatyn qurylystyń ózindik erejesi jazylǵan jáne ol saqtalýy tiis.
Atalǵan máselege qatysty Esil basseindik inspektsiiasynyń basshysy Serikjan Beketaev túsinik berdi.
«Esil ózenniń taiazdaý máselesi buǵan deiin de birneshe ret kóterildi. Qalalyq ekologiia departamenti atalǵan faktini tekserip, tirkedi de. Biz óz kezegimizde quzyrly organdarǵa hat joldadyq, másele baqylaýǵa alyndy. Rasymen ótken jyly ózen tartylýy baiqaldy. Jalpy ózen sýynyń azaiýy onyń sapasyna da áser etedi», - deidi ol.
