Qorshaǵan ortany qorǵaý - bala kezden ómirdiń sońyna deiin belsendi áreketti talap etedi. Bul týraly ekologiialyq bilimge qatysty Facebook-tegi KUN.KZ ashyq media platformasynda ótken onlain konferentsiiada aityldy, dep habarlaidy QazAqparat.
«Ekologiia - mektep pánimen ǵana shektelmeitin aýqymdy taqyryp. Ekologiialyq bilim berýge qatysty alǵashqy másele 1977 jyly Tbiliside ótken konferentsiiada talqylanǵan. Osy konferentsiiada da «bul bilim berý me, álde ekologiiaǵa qatysty sana qalyptastyrý ma?» degen másele tóńireginde áńgime qozǵaldy. Sodan beri kele jatqan tájiribe bul - bilim berý ǵana emes, qoǵamda ekologiialyq sana qalyptastyrý maqsatyn ustanǵan qozǵalysqa ainalyp kele jatyr», - deidi WikiBilim negizin qalaýshy, Ulttyq senim keńesiniń múshesi Raýan Kenjehanuly.
Ol ekologiialyq sana neden qalyptasatyny týraly aitty.
«Birinshiden, qorshaǵan orta týraly bilim kerek. Ekologiialyq bilim bir emes, barlyq pán aiasynda berilýi kerek. Ekinshiden, alǵan bilim negizinde tabiǵatqa, qorshaǵan ortaǵa degen kózqaras qalyptasady. Osynyń negizinde qorshaǵan ortamen qarym-qatynas túzýge arnalǵan daǵdylar qalyptasady. Osylardyń negizinde belsendi áreketke daiyndyq qalyptasady. Qorshaǵan ortany qorǵaý - bala kezden ómirdiń sońyna deiin belsendi áreketterdi talap etedi», - deidi ol.
Onyń aitýynsha, ekologiialyq sana ómir boiy qalyptasatyn dúnie.
«Ómir boiy oqityn bolsaq, ol mekteptegi jekelei pán emes, bizdi qorshaǵan barlyq aqparat. Ol - balalar ádebieti, mýltfilm, film, jarnama jáne media salasyndaǵy jumystar. Bul úlken ǵalamdyq qozǵalys bolǵannan keiin biz halyqaralyq uiymdardyń osy salada jinaǵan tájiribesin zerttep, qaraimyz. Bul qozǵalystyń álem boiynsha qaǵidasy - ǵalamdyq deńgeide oila, biraq aimaqtyq deńgeide áreket et. Iaǵni, bala muzdyqtardyń erýi máselesi týraly oilasa, ol Antraktidadaǵy muzdyqtardy emes, Alataýdyń muzdyǵy týraly oilaýy kerek. Al shóleit jerler týraly oilaǵanda Afrikanyń shóli emes, Mańǵystaýdyń shóli men ony sheshý máseleleri týraly oilaýy kerek. Bul óte mańyzdy», - deidi Raýan Kenjehanuly.
