Ekologiia, geologiia jáne tabiǵi resýrstar ministri Maǵzum Myrzaǵaliev Óskemen qalasyna mamandardy jiberip, qalanyń ekologiialyq ahýalynyń mán-jaiyn anyqtamaq, dep habarlaidy QazAqparat.
«Maǵan Óskemende túsirilgen beinejazbany túsindirýdi surap, habarlasqandar boldy. Bul qaladaǵy ekologiialyq jaǵdaidyń asa máz emestigi bizge málim. Munyń bári eń aldymen iri ónerkásip óndirisiniń, gazben lastanýǵa bailanysty másele. Ministrlik ónerkásip kásiporny shyǵaryndylaryn azaitý úshin josparly jumys júrgizip jatyr. Al jańa Ekologiialyq kodeks qabyldanǵan soń barlyq kompaniialar qorshaǵan ortaǵa zardapty azaitý úshin óz óndirisinde eń ozyq qoljetimdi tehnologiialardy ornatýǵa mindetti. Qorshaǵan ortanyń emissiia tólemi de ósedi», - dep túsindirdi Ekologiia ministrliginiń baspasóz hatshysy Samal Ibraeva.
Onyń aitýynsha, jańa Ekologiialyq kodeks boiynsha kompaniialarǵa aiyppulmen qutyla salý ońaiǵa túspeidi.
«Osy aralyqta Qazaqstannyń Ekologiia, geologiia jáne tabiǵi resýrstar ministri Maǵzum Myrzaǵalievtiń tapsyrmasy boiynsha Óskemenge Ekologiialyq retteý jáne baqylaý komitetiniń tóraǵasy Zulfyhar Joldasov baryp, sol jerde azamattardy qabyldap, mán-jaidy anyqtaidy. Sizderge jaǵdaidy habarlap otyramyz», - deidi ol.
Aita ketsek, osydan birneshe kún buryn óskemendik oqýshy qala shetindegi qyrǵa shyǵyp, Óskemendi kómkergen kók tútinniń videosyn jariialaǵan bolatyn. Oqýshy videoda «qala shetine taza aýamen tynystaý úshin» shyqqanyn aita kele shahardaǵy kók tútinniń ishinen shahardaǵy alyp murjalar ǵana kórinip turǵanyn baiandaidy.
