Qazaqstannyń orman sharýashylyǵyn damytyp, janýarlar dúniesin baiytýda qandai máseleler bar? Bul suraqqa Ekologiia, geologiia jáne tabiǵi resýrstar ministri Maǵzum Myrzaǵaliev jaýap berdi, dep habarlaidy QazAqparat.
«Elde ormandardy molyqtyrý kóleminiń artýy baiqalady - 2018 jyly 52,7 myń gektardy qurasa, ótken jyly 64 myń gektarǵa jetti. 4,6 myń gektar alańda elordanyń jasyl aimaǵyn qurý boiynsha jumystar júrgizilgen bolatyn. Atyraý, Kókshetaý, Qaraǵandy, Aqtóbe, Qyzylorda, Túrkistannyń, oblys ortalyqtarynyń ainalasynda uqsas aimaqtar qurýdy josparlaýdamyz. Qazirdiń ózinde jumys jobalary ázirlendi. 2030 jylǵa qarai jasyl aimaqtardyń alańyn 68,0 myń gektarǵa jetkizý josparlanýda», - dedi Maǵzum Myrzaǵaliev búgin Ortalyq kommýnikatsiialar qyzmetinde ótken halyqqa onlain esep berý barysynda.
Ministr sonymen qatar orman órtteriniń aldyn alý jumystary jalǵasyp jatqanyn aitady. Alaida, qabyldanǵan sharalarǵa qaramastan, jyl basynan beri 16 myń gektardan astam aýmaqta 191 orman órti tirkelgen. Kelgen shyǵyn 1,8 mlrd teńgeni qurady.
«Orman alqaptarynyń jaǵdaiyna qoǵamdyq baqylaý júrgizýge el turǵyndaryn barynsha tartý úshin arnaiy veb-sait iske qosyldy. Sekseýil ekpelerin saqtaý da biz úshin mańyzdy suraq. 2019 jyly Aral teńiziniń qurǵaǵan túbinde Korei orman qyzmetimen ózara is-qimyl jasaý aiasynda 5 myń gektarǵa egildi. Osy jyly 2,5 myń gektarǵa otyrǵyzylady. Sondai-aq 2019 jyly Almaty, Jambyl, Qyzylorda jáne Túrkistan oblystarynda 165,6 myń sekseýil ekpeleri jáne 23,5 myń gektar sekseýil tuqymy otyrǵyzyldy. Tutastai alǵanda, biyl «Ósimdik álemi týraly» zań jobasyn jáne 2030 jylǵa deiingi Qazaqstannyń biologiialyq ártúrliligin saqtaý tujyrymdamasyn daiyndaimyz», - dedi ol.
