Ekologiia, geologiia jáne tabiǵi resýrstar ministrligi jýrnalisterge arnalǵan brifingide qaldyqtardy energetikalyq kádege jaratý zaýytyn qurýdyń josparyn usyndy, dep habarlaidy "Ult aqparat" vedomstvonyń baspasóz qyzmetine silteme jasap.
«Biyl Qazaqstannyń tórt óńirinde qatty turmystyq qaldyqty bólek jinaýǵa arnalǵan 7 230 konteiner ornatylyp, jalpy qýatty jylyna 300 myń tonna bolatyn úsh jańa qoqys suryptaý kesheni iske qosylady. Qazirgi ýaqytta polimer men aralas qaptama (tetrapak) qaldyqtaryn qaita óńdeý keshenderin salý boiynsha jobalar konkýrstyq irikteý ótkizilip jatyr. Óńirlerde QTQ-ny bólek jinaýdy damytýǵa arnalǵan nysandar iske qosylyp, infraqurylymdy damytqanda 2025 jylǵa deiin qaitalama shikizat (metall, plastik, shyny jáne plastik) óńdeý kólemin 30%-ǵa deiin jetkizýge múmkindik beredi. Qaita óńdeýge jaramaityn qaldyqtar jańa ekologiialyq kodekske sáikes energiiaǵa ainaldyrý («Waste to Energy») zaýyttaryna jiberiledi.
«Qaldyqty bólek jinaý jáne depozittik-kepildik júiesin engizý arqyly qaldyqtardyń 30%-yn qaita kádege jaratýǵa múmkindik beredi. Jalpy qaldyqtyń 20 paiyzdaiy órteýge jiberilmeidi. Qalǵan qaldyqtar qatty lastanǵan jáne búgingi tańda olardy joiýdyń jalǵyz joly - energetikalyq kádege jaratý bolyp sanalady», - deidi ekologiia, geologiia jáne tabiǵi resýrstar vitse-ministri Ahmetjan Pirimqulov.
20 mamyrda ekologiia ministrligi qaldyqty energiiaǵa ainaldyrý jobalary boiynsha aýktsiondyq saýda-sattyq jariialady. «Waste to Energy» keshenderin Aqtóbe, Almaty, Óskemen, Nur-Sultan, Qaraǵandy jáne Shymkent qalalarynda iske qosý josparlanyp otyr. Zaýyttardyń qurylysy investorlardy tartý esebinen júrgizý josparlanǵan. Investorlarǵa qoilatyn basty talap - Eýropalyq Parlament pen Eýropalyq Odaq Keńesiniń 2010/75/EO direktivasynyń normasyna sáikes tútin gazyn tazartýdyń bes satyly júiesin ornatý. Bolashaq zaýyttar shyǵaryndylardy baqylaityn avtomattandyrylǵan júiemen jabdyqtalady. Qazirgi ýaqytta jer ýchaskelerin berý jáne infraqurylym júrgizýge qatysty máseleler pysyqtalyp jatyr.
Boljam boiynsha, alty zaýytty iske qosý nátijesinde 2025 jylǵa qarai qaldyq óńdeý kólemin 30%-ǵa deiin jetkizýge múmkindik beredi. Órtelmeitin qaldyq kólemi 20%-da qurasa, qalǵan qaldyqty eneregiiaǵa ainaldyrý jospary tur.
