QR Ekologiia, geologiia jáne tabiǵi resýrstar ministri Maǵzum Myrzaǵaliev geologiialyq zertteýler jumysynyń deńgeii men óńirdiń resýrstyq bazasynyń kórsetkishterimen tanysý úshin Qaraǵandy oblysyna bardy, dep habarlaidy "Ult aqparat".
Atalmysh vedomostvonyń baspasóz qyzmetiniń habarlaýynsha, ekologiia ministri oblys ákimi Jeńis Qasymbekpen birge metallýrgiia, taý-ken, kómir keni, mys óndirisi salalaryndaǵy ónerkásip oryndary basshylarynyń qatysýymen jinalys ótkizdi.
Atap aitqanda, kezdesýde «ArselorMittal Temirtaý», «Qazaqmys», «Shubarkól Kómir», «YDD Corporation» kompaniialary ókilderi jáne taǵy basqalar boldy.
Maǵzum Myrzaǵalievtiń sózinshe, Qaraǵandy oblysy mineraldyq-shikizat bazasynyń áleýeti joǵary.
«Bul jerde iri taý-ken óndiristeri bar. Sońǵy 10 jylda óńirdiń jer qoinaýyn paidalanýǵa tartylǵan investitsiia kólemi úsh esege ósken. Jer betine jaqyn ken oryndarynyń qory taýsylýǵa jaqyn ekendigin eskere otyryp, Qaraǵandy oblysyndaǵy geologiialyq barlaý jumystaryn jańa tehnologiialardy qoldaný arqyly tereńdete túsý kerek. Jańa ken ornyn tabý men ony qoldanysqa engizýdiń arasy 10-15 jyl bolǵandyqtan bul jumysqa búgin kirisý qajet», - dedi M. Myrzaǵaliev jiyn barysynda.
Ministr sonymen birge óńirdiń ekologiialyq ahýalyn jaqsartýǵa bailanysty sharalardyń mańyzdylyǵyna toqtaldy.
«Oblystaǵy atmosferalyq aýanyń lastaný problemasy óte ózekti. Bul sózsiz iri ónerkásiptiń jumysyna bailanysty. Sondyqtan óndiristi arttyra otyryp, shyǵaryndylardyń kórsetkishine de nazar aýdarý kerek. Mysaly, «YDD Corporation» JShS zaýytynda óndiris tiimdiligi kórsetkishiniń joǵarylyǵy baiqalady. Shyǵaryndylar kólemi az», - dep atap ótti ministr.
Qazir Qaraǵandy oblysynda memleket balansynda 51 mys, 56 altyn, 32 qorǵasyn, 28 tsink, 36 marganets rýdasy jáne 28 temir ken oryndary bar. Tas kómir jáne qońyr kómirdiń negizgi qory osynda shoǵyrlanǵan. Qaraǵandy kómir basseini respýblikadaǵy metallýrgiialyq ónerkásip kásiporyndaryna koks kómirin jetkizedi.
«Memleket basshysy geologiialyq barlaýdyń turaqty damýyn qamtamasyz etýdi jáne mineraldyq shikizat bazasyn tolyqtyrýdy tapsyrǵan. Bul úshin geologiialyq barlaýdyń 5 jyldyq memlekettik baǵdarlamasy jasalady. Atalǵan baǵdarlama elimizdiń tabiǵi bailyqtaryn geologiialyq zertteý salasyndaǵy barlyq tapsyrmalardy oryndaýǵa baǵyttalǵan asa mańyzdy qujat bolady», - dep atap ótti ministr.
Talqylaý barysynda mineraldyq shikizat bazasy mys, altyn, polimetall jáne marganetsti geologiialyq barlaý jumystarymen tolyǵatyny aityldy.
