Ekologiia, geologiia jáne tabiǵi resýrstar ministri Serikqali Brekeshev jumys saparymen Túrkistan oblysyna bardy, dep habarlaidy "Ult aqparat" ministrliktiń baspasóz qyzmetine silteme jasap.
Ministr Túrkistan oblysynda jergilikti turǵyndarmen kezdesip, ońtústik óńirdegi ózekti problemalardyń biri – sý máselesin talqylady.
Ministr aldymen «Túrkistan magistraldy kanalyna» baryp, kanal arnalaryn betondaý jumysymen tanysty. Kanal uzyndyǵy 149 km quraidy jáne jergilikti sharýa qojalyqtarynyń negizgi sý kózi bolyp tabylady. Júrgizilip jatqan jumystyń mańyzdylyǵyna toqtalǵan Serikqali Brekeshev joba aiaqtalǵan soń sý shyǵyny azaiatynyn habarlady. 2020 jyly bastalǵan qurylys jumystary keler jyly aiaqtalyp, paidalanýǵa beriledi.
Sondai-aq Eski Iqan aýyldyq okrýginde «Irrigatsiialyq jáne drenajdyq júielerdi jetildirý jobasy» aiasynda júrgizilip jatqan jumystarmen tanysty. Joba aiasynda 72 dana tik drenajdy uńǵyma jáne 300 shaqyrymǵa jýyq kanal jańǵyrady. Serikqali Brekeshev qurylys qarqynyn jyldamdatyp, josparǵa sai aiaqtaýdy tapsyrdy.
Serikqali Brekeshev artynsha óńirdegi sý tasqyny máselesin sheshýge septigin tigizgen «Kóksarai» sý rettegishiniń búgingi kúiin baiqady. «Qazsýshar» RMK Túrkistan filialynyń direktory Kerimjanov Merlan 2011 jyly qoldanysqa berilgen kontrrettegish jańǵyrtýdy qajet etedindigin jetkizdi. Jańǵyrtý maqsatynda daiyndalǵan jobany ministrge tanystyryp, mamandarmen talqylady. Aitylǵan pikirlermen men usynystar eskerilip, jobalaý jumystary jyl sońyna deiin usynylatyn boldy.
Jumys sapary aiasynda Túrkistan oblysynyń ákimi Ómirzaq Shókeev, EGTRM Sý resýrstary komitetiniń tóraǵasy Nurlan Aldamjarov, «Qazsýshar» RMK bas direktory Altai Eljasovpen birge Shardara sý qoimasyna bardy. Jergilikti turǵyndarmen tildesip, sý sharýashylyǵyna qatysty ózekti máselelerdi talqylady. Turǵyndardy 50 jyldan asqan sý qoimasynyń qaýipsizdigi alańdatady. Ministr Serikqali Brekeshev qoimany jańǵyrtý jumysymen ainalysyp jatqan merdiger kompaniiaǵa qurylys jumystaryn belgilengen ýaqytta aiaqtaýdy tapsyrdy. Sondai-aq jobada kórsetilgen qarajattan asyp, artyq shyǵyn keltirmeýdi mindettedi.
Shardara sý qoimasynda júzege asyrylyp jatqan jóndeý, seismoturaqtylyǵyn arttyrý jumystary 2022 jyly aiaqtalady. Qurylys aiaqtalǵan soń 7 baldyq jer silkinisine shydas beretin tózimdilikke ie bolady.
Sondai-aq ministr Serikqali Brekeshev jumys sapary aiasynda jergilikti balyq sharýashylyǵy salasynyń kásipkerlerimen kezdesti. Óńirdegi balyq óndirisiniń qarqynyn baiqap, ulǵaitý maqsatynda memleket tarapynan qolǵa alynyp jatqan jobalardy tanystyrdy.
