ەكولوگييا, گەولوگييا جەنە تابيعي رەسۋرستار مينيسترٸ سەرٸكقالي برەكەشەۆ جۇمىس ساپارىمەن تٷركٸستان وبلىسىنا باردى, دەپ حابارلايدى "ۇلت اقپارات" مينيسترلٸكتٸڭ باسپاسٶز قىزمەتٸنە سٸلتەمە جاساپ.
مينيستر تٷركٸستان وبلىسىندا جەرگٸلٸكتٸ تۇرعىندارمەن كەزدەسٸپ, وڭتٷستٸك ٶڭٸردەگٸ ٶزەكتٸ پروبلەمالاردىڭ بٸرٸ – سۋ مەسەلەسٸن تالقىلادى.
مينيستر الدىمەن «تٷركٸستان ماگيسترالدى كانالىنا» بارىپ, كانال ارنالارىن بەتونداۋ جۇمىسىمەن تانىستى. كانال ۇزىندىعى 149 كم قۇرايدى جەنە جەرگٸلٸكتٸ شارۋا قوجالىقتارىنىڭ نەگٸزگٸ سۋ كٶزٸ بولىپ تابىلادى. جٷرگٸزٸلٸپ جاتقان جۇمىستىڭ ماڭىزدىلىعىنا توقتالعان سەرٸكقالي برەكەشەۆ جوبا اياقتالعان سوڭ سۋ شىعىنى ازاياتىنىن حابارلادى. 2020 جىلى باستالعان قۇرىلىس جۇمىستارى كەلەر جىلى اياقتالىپ, پايدالانۋعا بەرٸلەدٸ.
سونداي-اق ەسكٸ يقان اۋىلدىق وكرۋگٸندە «يرريگاتسييالىق جەنە درەناجدىق جٷيەلەردٸ جەتٸلدٸرۋ جوباسى» اياسىندا جٷرگٸزٸلٸپ جاتقان جۇمىستارمەن تانىستى. جوبا اياسىندا 72 دانا تٸك درەناجدى ۇڭعىما جەنە 300 شاقىرىمعا جۋىق كانال جاڭعىرادى. سەرٸكقالي برەكەشەۆ قۇرىلىس قارقىنىن جىلدامداتىپ, جوسپارعا ساي اياقتاۋدى تاپسىردى.
سەرٸكقالي برەكەشەۆ ارتىنشا ٶڭٸردەگٸ سۋ تاسقىنى مەسەلەسٸن شەشۋگە سەپتٸگٸن تيگٸزگەن «كٶكساراي» سۋ رەتتەگٸشٸنٸڭ بٷگٸنگٸ كٷيٸن بايقادى. «قازسۋشار» رمك تٷركٸستان فيليالىنىڭ ديرەكتورى كەريمجانوۆ مەرلان 2011 جىلى قولدانىسقا بەرٸلگەن كونتررەتتەگٸش جاڭعىرتۋدى قاجەت ەتەدٸندٸگٸن جەتكٸزدٸ. جاڭعىرتۋ ماقساتىندا دايىندالعان جوبانى مينيسترگە تانىستىرىپ, ماماندارمەن تالقىلادى. ايتىلعان پٸكٸرلەرمەن مەن ۇسىنىستار ەسكەرٸلٸپ, جوبالاۋ جۇمىستارى جىل سوڭىنا دەيٸن ۇسىنىلاتىن بولدى.
جۇمىس ساپارى اياسىندا تٷركٸستان وبلىسىنىڭ ەكٸمٸ ٶمٸرزاق شٶكەەۆ, ەگترم سۋ رەسۋرستارى كوميتەتٸنٸڭ تٶراعاسى نۇرلان الدامجاروۆ, «قازسۋشار» رمك باس ديرەكتورى التاي ەلجاسوۆپەن بٸرگە شاردارا سۋ قويماسىنا باردى. جەرگٸلٸكتٸ تۇرعىندارمەن تٸلدەسٸپ, سۋ شارۋاشىلىعىنا قاتىستى ٶزەكتٸ مەسەلەلەردٸ تالقىلادى. تۇرعىنداردى 50 جىلدان اسقان سۋ قويماسىنىڭ قاۋٸپسٸزدٸگٸ الاڭداتادى. مينيستر سەرٸكقالي برەكەشەۆ قويمانى جاڭعىرتۋ جۇمىسىمەن اينالىسىپ جاتقان مەردٸگەر كومپانيياعا قۇرىلىس جۇمىستارىن بەلگٸلەنگەن ۋاقىتتا اياقتاۋدى تاپسىردى. سونداي-اق جوبادا كٶرسەتٸلگەن قاراجاتتان اسىپ, ارتىق شىعىن كەلتٸرمەۋدٸ مٸندەتتەدٸ.
شاردارا سۋ قويماسىندا جٷزەگە اسىرىلىپ جاتقان جٶندەۋ, سەيسموتۇراقتىلىعىن ارتتىرۋ جۇمىستارى 2022 جىلى اياقتالادى. قۇرىلىس اياقتالعان سوڭ 7 بالدىق جەر سٸلكٸنٸسٸنە شىداس بەرەتٸن تٶزٸمدٸلٸككە يە بولادى.
سونداي-اق مينيستر سەرٸكقالي برەكەشەۆ جۇمىس ساپارى اياسىندا جەرگٸلٸكتٸ بالىق شارۋاشىلىعى سالاسىنىڭ كەسٸپكەرلەرٸمەن كەزدەستٸ. ٶڭٸردەگٸ بالىق ٶندٸرٸسٸنٸڭ قارقىنىن بايقاپ, ۇلعايتۋ ماقساتىندا مەملەكەت تاراپىنان قولعا الىنىپ جاتقان جوبالاردى تانىستىردى.
