QR Ekologiia, geologiia jáne tabiǵi resýrstar ministri Maǵzum Myrzaǵaliev qazaqstandyq fermerlerdi sýmen qamtamasyz etýdiń birneshe jolyn usyndy, dep habarlaidy QazAqparat.
«Fermerlerdi sýmen qamtamasyz etý maqsatynda biz kelesi jumystardy júrgizemiz. Birinshiden, kórshi eldermen qarym-qatynas. Syrdariia ózeni boiynsha biz Qyrǵyz elimen qosymsha sý aǵyzý týraly kelisimge keldik. Vegetatsiia shyńynda (maýsym-tamyz) Toqtoǵul sý qoimasynan qosymsha 330 million tekshe metr sý qory bolady. Dál osyndai sý kólemin Ózbekstan aýmaǵy arqyly ótkizý týraly da ýaǵdalastyqqa qol jetkizildi. Sondai-aq, tájik jáne ózbek taraptarymen birlesip, biyl 16 maýsymda «Bahri Tochik» sý qoimasynyń jumys rejimin kelisý boiynsha maýsym-tamyz kezeńine arnalǵan jumys keńesiniń hattamasyna qol qoiyldy», - dedi M. Myrzaǵaliev.
Ministrdiń aitýynsha, búginde kollektorlyq-drenajdyq sýlardy qaita paidalaný tájiribesi qaita qolǵa alyndy. Sol sekildi arnalardy mehanikalyq tazartý jumystary júrgizilip, egindi sýarýdyń kestesi ázirlendi.
«Jeke toqtalsaq, Jaiyq ózeni boiynsha osy jyldyń maýsym aiynda Orynbor qalasynda Sý sharýashylyǵy uiymdarynyń kezdesýi ótti. Onda Jaiyq ózeni basseinindegi sý sharýashylyǵy jaǵdaiy talqylandy. Kezdesý qorytyndysy boiynsha aldaǵy jaz-kúz mezgiline arnalǵan Iriklin sý qoimasynyń jumys rejimi bekitildi. Odan bólek, biyl aqpan-naýryz ailarynda biz aýyl sharýashylyǵy ministrligimen óńirlerge baryp jinalystar ótkizdik. Qalyptasyp otyrǵan sý sharýashylyǵy jaǵdaiyn talqylap, sýdy kóp qajet etetin daqyldardyń egistigin azaitýdy usyndyq», - deidi ol.
Buǵan deiin Ekologiia ministri elimizdegi sý resýrsy qory týraly málimetpen bólisken bolatyn.
