قر ەكولوگييا, گەولوگييا جەنە تابيعي رەسۋرستار مينيسترٸ ماعزۇم مىرزاعاليەۆ قازاقستاندىق فەرمەرلەردٸ سۋمەن قامتاماسىز ەتۋدٸڭ بٸرنەشە جولىن ۇسىندى, دەپ حابارلايدى قازاقپارات.
«فەرمەرلەردٸ سۋمەن قامتاماسىز ەتۋ ماقساتىندا بٸز كەلەسٸ جۇمىستاردى جٷرگٸزەمٸز. بٸرٸنشٸدەن, كٶرشٸ ەلدەرمەن قارىم-قاتىناس. سىردارييا ٶزەنٸ بويىنشا بٸز قىرعىز ەلٸمەن قوسىمشا سۋ اعىزۋ تۋرالى كەلٸسٸمگە كەلدٸك. ۆەگەتاتسييا شىڭىندا (ماۋسىم-تامىز) توقتوعۇل سۋ قويماسىنان قوسىمشا 330 ميلليون تەكشە مەتر سۋ قورى بولادى. دەل وسىنداي سۋ كٶلەمٸن ٶزبەكستان اۋماعى ارقىلى ٶتكٸزۋ تۋرالى دا ۋاعدالاستىققا قول جەتكٸزٸلدٸ. سونداي-اق, تەجٸك جەنە ٶزبەك تاراپتارىمەن بٸرلەسٸپ, بيىل 16 ماۋسىمدا «باحري توچيك» سۋ قويماسىنىڭ جۇمىس رەجيمٸن كەلٸسۋ بويىنشا ماۋسىم-تامىز كەزەڭٸنە ارنالعان جۇمىس كەڭەسٸنٸڭ حاتتاماسىنا قول قويىلدى», - دەدٸ م. مىرزاعاليەۆ.
مينيستردٸڭ ايتۋىنشا, بٷگٸندە كوللەكتورلىق-درەناجدىق سۋلاردى قايتا پايدالانۋ تەجٸريبەسٸ قايتا قولعا الىندى. سول سەكٸلدٸ ارنالاردى مەحانيكالىق تازارتۋ جۇمىستارى جٷرگٸزٸلٸپ, ەگٸندٸ سۋارۋدىڭ كەستەسٸ ەزٸرلەندٸ.
«جەكە توقتالساق, جايىق ٶزەنٸ بويىنشا وسى جىلدىڭ ماۋسىم ايىندا ورىنبور قالاسىندا سۋ شارۋاشىلىعى ۇيىمدارىنىڭ كەزدەسۋٸ ٶتتٸ. وندا جايىق ٶزەنٸ باسسەينٸندەگٸ سۋ شارۋاشىلىعى جاعدايى تالقىلاندى. كەزدەسۋ قورىتىندىسى بويىنشا الداعى جاز-كٷز مەزگٸلٸنە ارنالعان يريكلين سۋ قويماسىنىڭ جۇمىس رەجيمٸ بەكٸتٸلدٸ. ودان بٶلەك, بيىل اقپان-ناۋرىز ايلارىندا بٸز اۋىل شارۋاشىلىعى مينيسترلٸگٸمەن ٶڭٸرلەرگە بارىپ جينالىستار ٶتكٸزدٸك. قالىپتاسىپ وتىرعان سۋ شارۋاشىلىعى جاعدايىن تالقىلاپ, سۋدى كٶپ قاجەت ەتەتٸن داقىلداردىڭ ەگٸستٸگٸن ازايتۋدى ۇسىندىق», - دەيدٸ ول.
بۇعان دەيٸن ەكولوگييا مينيسترٸ ەلٸمٸزدەگٸ سۋ رەسۋرسى قورى تۋرالى مەلٸمەتپەن بٶلٸسكەن بولاتىن.
