Ekologiia, geologiia jáne tabiǵi resýrstar ministri Maǵzum Myrzaǵaliev aldaǵy ýaqytta eldi sýmen qamtamasyz etýde kezdesýi múmkin negizgi problemalardy atady, dep habarlaidy QazAqparat.
«Qazirgi ýaqytta eldegi sýmen qamtamasyz etý jaǵdaiy ekonomika salalary men halyqtyń talaptaryn qanaǵattandyryp otyr. Alaida sý salasynyń mynadai negizgi túitkilderin atap ótýge bolady. Birinshiden – ózen aǵynynyń qulaýy men sýdy tutyný kóleminiń ósýi saldarynan orta jáne uzaq merzimdi kezeńde eldi sýmen qamtamasyz etýdiń boljamy tómendeýde. Ekinshiden - arnalardyń jáne irrigatsiialyq júielerdiń syndarly tozýy saldarynan tasymaldaý kezindegi sýdyń joǵary shyǵyny. Atap aitqanda, aýyl sharýashylyǵynda shyǵyndar 50%-ǵa deiin jetedi. Olardy qysqartý úshin arnalardy jóndeý men sý resýrstaryn avtomatty basqarýdy engizý talap etiledi. Kelesi - infraqurylymǵa tartylatyn investitsiialardyń jáne bilikti kadrlardyń jetispeýshiligi», - dedi Maǵzum Myrzaǵaliev OKQ ótken halyqqa esep berý kezdesýinde.
Osyǵan bailanysty, ministrliktiń aldynda 2030 jyly qosymsha jer ústi sý resýrstaryn ulǵaitý esebinen 100 shaqyrym deńgeiinde sý balansyn saqtaý, sýarmaly jerlerdi 1,4-ten 3,0 mln ga-ǵa deiin ulǵaitý úshin jańa irrigatsiialyq júielerdi salý, sý sharýashylyǵy infraqurylymyn jańǵyrtý jáne qaita jańartý, sý salasyn tsifrlandyrý, sý únemdeý mindetteri tur.
«Jerdi sýlandyrý boiynsha kelesi jumystar atqaryldy. 2019 jyly 66 myń ga alqapta sý sharýashylyǵy infraqurylymy qalpyna keltirildi. Sondai-aq, elimizdiń 5 óńirinde (Almaty, Jambyl, Túrkistan, Qyzylorda jáne Aqtóbe oblystary) sýarmaly jerlerdiń shamamen 0,5 mln ga (492 myń ga) sýmen qamtamasyz etilýin arttyrý jáne qalpyna keltirý boiynsha tiisti jobalar iske asyrylýda. Qaryz jáne biýdjet qarajaty esebinen qarjylandyrýdyń jalpy somasy - 274 mlrd teńge. Jalpy 3 jyl ishinde biz 6,7 myń shaqyrymnan astam arnalar, 4 sý qoimasy, 4 sý toraby, 239 tik drenaj uńǵymasy jáne 23 myń ózge de sý sharýashylyǵy qurylystaryn qaita jańǵyrtatyn bolamyz», - dedi ol.
Ministrdiń aitýynsha, osynyń arqasynda 88 myń jumys orny, onyń ishinde qurylys kezeńinde 11 myń jumys orny ashylatynyn aitady. Qalpyna keltirilgen sýarmaly jerlerdi ainalymǵa engizý aýylda 77 myń turaqty jumys ornyn ashýǵa yqpal etpek.
