Qazaqstannyń ekologiia, geologiia jáne tabiǵi resýrstar ministri Maǵzum Myrzaǵaliev seisenbi kúni «ArselorMittal» kompaniiasynyń vitse-prezidenti Vijai Goial myrzamen kezdesti, dep habarlaidy "Ult aqparat" ministrliktiń baspasóz qyzmetine silteme jasap.
Kezdesý barysynda taraptar kompaniia ótkizetin tabiǵatty qorǵaý is-sharalaryn, sondai-aq emissiialardyń asyp ketýi boiynsha jaqynda bolǵan oqiǵany talqylady.
Áńgime barysynda ministr Temirtaý atmosferasynyń lastaný deńgeii búgingi tańda eldiń basty ekologiialyq problemalarynyń biri bolyp tabylatynyn atap ótti.
M.Myrzaǵalievtiń málimetinshe, jyl saiyn «Arselor Mittal Temirtaý» AQ metallýrgiialyq kesheninen atmosferalyq aýaǵa 230 myń tonnadan astam lastaýshy zattar shyǵarylady, bul qalanyń árbir turǵynyna (balalar men áielderdi qosa alǵanda) shamamen 11 tonna lastaýshy zattan keledi.
Ekologiia ministrliginiń basshysy kompaniia júzege asyryp jatqan tabiǵatty qorǵaý is-sharalaryn tiimsiz dep atady.
«Kásiporynda tek qaǵaz júzinde jáne «kóz boiaýshylyq» úshin jumys isteitin tiimdiligi az tabiǵat qorǵaý sharalary engizildi», - dep atap ótti ministr.
Sońǵy 5 jylda kásiporyn tabiǵatty qorǵaý is-sharalaryna 28 mlrd. teńge (67 mln. dollar) jumsady, al ekologiialyq tiimdilik shyǵaryndylardyń 190 tonna nemese «Arselor Mittal Temirtaý» naqty shyǵaryndylarynyń 0,08% - na tómendeýin ǵana qurady.
2019 jyly kompaniia 2019-2024 jyldar ishinde shyǵaryndylar kólemin 60 myń tonnaǵa azaitý mindetin ózine aldy.
«Alaida, kásiporyn áli kúnge deiin ózine alǵan mindettemelerdi oryndaý boiynsha sharalar qabyldamady», - dep atap ótti M.Myrzaǵaliev.
Temirtaýdyń ekologiialyq ahýalyn eskere otyryp, Ekologiia ministrliginiń basshysy kompaniia basshylyǵynyń aldyna eń ozyq qoljetimdi tehnologiialarǵa kóshe otyryp, shyǵaryndylar kólemin taiaýdaǵy 4 jylda keminde 30%-ǵa tómendete otyryp, óndiristi tolyq rekonstrýktsiialaý jáne jańǵyrtý týraly másele qoidy.
Sondai-aq, ministr naqty ýaqyt rejiminde derekterdi bere otyryp, emissiialar monitoringiniń avtomattandyrylǵan júiesin engizý qajettigin atap ótti.
Qala ekologiiasynyń jai-kúiin jaqsartý sharalarynyń qatarynda M.Myrzaǵaliev kompaniianyń Temirtaý men oǵan irgeles aýmaqta (500 myń aǵash otyrǵyzý) «jasyl beldeý» qurý jónindegi mindettemesin eske saldy.
