Soltústik Qazaqstan oblysyna kelgen ekologiia, geologiia jáne tabiǵi resýrstar ministri Serikqali Brekeshev Petropavldaǵy jaqynda apat bolǵan jylý-elektr ortalyǵyna bardy, dep habarlaidy QazAqparat.
Ekologiia, geologiia jáne tabiǵi resýrstar ministri Serikqali Brekeshev óńirdegi birqatar nysandy aralap, tústen keiin «SQO-nyń ekologiialyq máseleleri jáne ony sheshý joldary» taqyrybyndaǵy jiynǵa qatyspaq.
Ministr barǵan birinshi nysan - jaqynda ǵana apat bolǵan Petropavldaǵy jylý-elektr ortalyǵy boldy.
«Ekologiia, geologiia jáne tabiǵi resýrstar ministrliginiń jáne óz atymnan qaza tapqan áieldiń otbasyna, týǵan-týystaryna qaiǵyryp kóńil aitamyn. Aýyr qasiret. Jylý-elektr ortalyǵynyń jumysshylaryna bar jaqsylyqty jáne jemisti eńbek tileimin», - dedi Serikqali Brekeshov.
Ekologiia ministriniń aitýynsha, Petropavldaǵy jylý-elektr ortalyǵy óńirdegi aýany eń kóp lastaityn kásiporyndardyń biri.
Atmosferaǵa taralatyn barlyq zalaldy shyǵaryndylardyń 70 %-y osy ortalyqqa tiesili.
«Byltyr 40 myń tonnaǵa jýyq, biyl 25 myń tonna aýaǵa ziiandy zattar taraǵan. Jylý ortalyǵynda kúl úiindisine qatysty da másele bar. Bas direktordyń aitýynsha, kásiporynnan jylyna 1 mln tonnadan astam kúl shyǵady. Bul da sheshimin tabýy tiis úlken másele.
Qazirgi ýaqytta kásiporyn kúldi jai ǵana tógip, úiip jatyr. Qazirgi ýaqytta bul qaldyqty tiimdi paidalanýdyń birneshe joly bar. Ony joldy salǵanda qoldanýǵa bolady, oń nátijesi bar. Bul Qaraǵandy oblysynda qoldanylyp jatyr. Sondai-aq tsement óndirisinde de paidalanýǵa bolady. Bul tehnologiialar jańa emes, burynnan bar, tek kásiporynǵa ony qolǵa alý qajet», - deidi Serikqali Brekeshov.
Jylý-elektr ortalyǵynda ministrge karbon shyǵaryndysy týraly, monitoring júrgizýdiń avtomattandyrylǵan júiesin jáne ekologiialyq kodekste bar ozyq qoljetimdi tehnologiiany engizý boiynsha suraqtar qoiyldy.
«Bul máselelerdi alda birlese qaraýǵa kelistik, ortaq bir sheshimge kelemiz dep oilaimyn. Úzdik qoljetimdi tehnologiialardy engizý arqyly aýany lastaityn zattardyń shyǵaryndysyn azaitýǵa bolady. Ekologiialyq kodekske sáikes, kompaniia 10 jyl merzimge keshendi ekologiialyq ruqsat alyp, emissiia tóleýden bosatylady. Biraq biz olardy teksere alamyz, eger kompaniia óz mindetterin oryndamasa, aiyppul salynady», - dedi ekologiia ministri.
Mamandardyń aitýynsha, qazirgi ýaqytta apat bolǵan kásiporynnan ekologiiaǵa keler qaýip joq. Tútin murjasy qulaǵannan keiin ekologiia departamenti sanitarlyq-qorǵanysh aimaǵynda monitoring júrgizdi. Aýany lastaityn zattardyń normadan joǵary shyǵaryndysy bolǵan joq. Qazir de mamandar baqylaýda ustap otyr. Budan basqa «Qazgidromet» kúndelikti monitoring júrgizedi.
