«ECOJER» qaýymdastyǵynyń bas direktory Rústem Qabjanov elimizdegi kútiletin klimattyq ózgerister týraly aitty. Bul týraly uiymnyń baspasóz qyzmeti habarlady.
«Sarapshylardyń baǵalaýynsha, Qazaqstandaǵy klimattyq ózgeristerdiń saldarynan jer shóleittenip, biologiialyq alýandyqqa nuqsan kelýi múmkin. Bul óz kezeginde áleýmettik-ekonomikalyq damýǵa áser etip, basqa da jaǵymsyz áserlerge alyp keledi», - dedi Rústem Qabjanov elordada ótken áleýmettik jobalar forýmynda.
Tabiǵat janashyry 2016 jyly Qazaqstan Parij kelisimin ratifikatsiialap, 2030 jylǵa qarai parniktik gaz shyǵaryndylaryn 1990 jylǵy deńgeiden 15%-ǵa qysqartýǵa mindetteme alǵanyn eske saldy.
«Parniktik gaz shyǵaryndylarynyń negizgi úlesi energetika salasyna tiesili. Barlyq shyǵaryndylardyń 40%-dan astamyn osy sala bóledi. Jylý jáne elektr energiiasyn óndirý úshin kómir qoldanyp otyrmyz. Sońǵy jyldary jańartylatyn energiia kózderi belsendi damyǵany ras. Alaida, 1990 jylǵa qaraǵanda parniktik gazdardyń tómendeý úlesi áli de aitarlyqtai emes. Kerisinshe, 2013-2018 jyldar aralyǵynda shyǵaryndylar kólemi 27,8%-ǵa ósti», - dedi «ECOJER» basshysy.
Sarapshy damyǵan elderdiń kóbi kómirtegin tutyný kólemin azaita otyryp damýdyń ulttyq strategiialaryn qabyldap jatqanyn atap ótti. Qazaqstan da solardan qalyspai, 2050 jylǵa deiingi tujyrymdamany ázirleitin jumys toby qurdy. Qujatta «jasyl ósim» jáne ulttyq ekonomikany tereń karbonsyzdandyrý sharalaryn iske asyrý kózdelgen. Dei turǵanmen, búginge deiin elimizde «jasyl energetikaǵa» engizdelgen ondaǵan joba iske asyryldy. Respýblika boiynsha jalpy qýaty 1685 MVt bolatyn 116 jańartylatyn energiia kóziniń nysany jumys isteidi. 2020 jyldyń qorytyndysy boiynsha «jasyl» energiia óndirisiniń kólemi saǵatyna 3,24 mlrd kVt bolyp, óndirilgen jalpy elektr energiiasynyń 3%-yn quraǵan.
«Jasyl ekonomikaǵa kóshý tujyrymdamasynyń 2020 jylǵy nysanaly indikatoryna qol jetkizilgenine qaramastan, parniktik gazdardy tómendetýi tiis jańartylatyn energiia kózderiniń úlesi áli de mardymsyz», - dep túiindedi Rústem Qabjanov.
