75 jyl buryn ekinshi dúniejúzilik soǵysta Tómengi Novgorodta qaza tapqan Quspanǵali Boranbaevtyń súiegi týǵan jeri Atyraý oblysy Qurmanǵazy aýdanyna jerlendi, - dep habarlaidy "Ult aqparat" Atyraý oblystyq Óńirlik kommýnikatsiialar qyzmetine silteme jasap.
Quspanǵali Boranbaev 1941 jyly 19 jasynda maidanǵa attanǵan, Parfinsk aýdanyndaǵy Tómengi Novgorodta bolǵan shaiqasta erlikpen qaza tapty. Ótken jyly osy aýdanda izdestirý toby 489 jaýyngerdiń súiegin tapqan, solardyń arasynda atyraýlyq sarbaz da bar. Batyr súiegin jerleý rásimine Quspanǵali Boranbaevtyń aǵaiyndary, ardagerler, jastar, izdeý toby músheleri qatysty.
Atyraý oblysynyń ákimi Nurlan Noǵaev soǵys kezinde habarsyz ketken jaýyngerdiń súiegin elge jetkizý jumystary qalai júrgenin aitty.
"Bizdiń búgingi ashyq aspanymyz úshin janyn qiǵan batyrymyzdy týǵan jer topyraǵyna tabystap otyrmyz. Quspanǵali aǵanyń taǵdyry týraly habar jetken boida oblystyq arhivterden aǵaiyn-týystary jaily derekter izdedik. Kórshiles Astrahan oblysyndaǵy arhivterge habarlastyq. Biraq eshqandai málimet shyqpady. Jyl boiy reseilik áriptestermen kelissózder júrgizdik. Sarbaz súiegin týystarynyń baryn rastaityn qujat bolǵan kezde ǵana berýge kelisti. Jyl boiy júz tom arhiv materialdary qaraldy, biraq izdeý jumystary nátijesiz boldy. Aqyry oblys basshylyǵy reseilikterden Quspanǵali Boranbaevtyń súiegin týǵan jerine jerleýge kelisim aldy", - deidi Nurlan Noǵaev.
"Barlyq máseleler sheshilip, súiekti Atyraýǵa ákelýge kelisim alynǵan kezde Quspanǵali Boranbaevtyń týystary tabyldy degen habar keldi. Munyń bári soǵysqa qatysqan batyrlarǵa degen qurmetti kórsetedi. Urpaqtarynyń arqasynda Quspanǵali aǵanyń rýhy týǵan topyraǵymen qaýyshty", - dep atap ótti Nurlan Noǵaev.
Quspanǵali Boranbaevtyń týystaryn izdeýge Qurmanǵazy aýdandyq ardagerler keńesiniń tóraǵasy Orynǵali Qumarǵaliev kóp jumys istedi.
"Bizdiń aýdannan soǵysqa 7480 jaýynger attandy, sonyń jartysyna jýyǵy maidan dalasynan oralmady", - deidi Orynǵali Qumarǵaliev. "76 jyldan keiin súiegi tabylyp, týǵan topyraǵymen tabysqan Quspanǵali Boranbaevtyń taǵdyry kóp kezdespeitin jaǵdai. Ár adam týǵan jerinde máńgilik tynys tabýdy armandaidy. Quspanǵali aǵanyń osy armany oryndaldy".
Rizashylyq sózderin Quspanǵali Boranbaevtyń týystary da aitady. Sonyń ishinde Aqtóbedegi Áliia Moldaǵulova atyndaǵy jáne Reseidegi Iaroslav oblysy Rybinsk qalasyndaǵy "Za Otvagý" izdestirý toptarynyń músheleri kóp eńbek sińirdi. Olar sarbazdyń medalony men aty-jóni oiylyp jazylǵan qasyǵyn tapqan.
Jaýynger súiegin jetkizý protsesi qiyndyq keltirmedi. Qazaqstannyń Reseidegi elshiligi, Sankt-Peterbýrg pen Astrahandaǵy bas konsýldyǵy qoldaý kórsetti. Solardyń septigimen soǵysta qaza tapqan jaýynger súiegi ushaqpen aldymen Astanaǵa, sosyn Atyraýǵa jetkizildi.
Kópshilikke soǵys 1945 jyly bitken bolyp kórineri anyq. Biraq maidannan oralmaǵan myńdaǵan sarbaz ben olardyń týystary úshin shaiqas alańynda qalǵan súiekterdiń týǵan topyraqpen qaýyshqan kezinde ǵana aiaqtalady. Jerlesimiz Quspanǵali Boranbaev úshin soǵys 2018 jyly támamdaldy.
