Premer-Ministr Álihan Smaiylovtyń tóraǵalyǵymen ótken Úkimet otyrysynda Ekibastuz qalasyn jylýmen qamtý máseleleri qaraldy, dep habarlaidy "Ult aqparat" primeminister.kz saityna silteme jasap.

Otyrys barysynda Pavlodar oblysynyń ákimi Ábilqaiyr Sqaqov tótenshe jaǵdaidyń hronologiiasyn usynyp, qaladaǵy aǵymdaǵy jaǵdai týraly aityp berdi. Sondai-aq ol qazirgi ýaqytta jylýmen qamtýdy qalpyna keltirý boiynsha jóndeý jumystary jalǵasyp jatqanyn atap ótti.

Óz kezeginde Premer-Ministr apatqa sebep bolǵan barlyq máselelerdi tez arada sheshý qajettigin atap ótti. Sonymen qatar Energetika ministrligine Indýstriia jáne infraqurylymdyq damý ministrligimen birlesip, «Ekibastuzjylýenergo» mekemesindegi tehnologiialyq erejelerdi buzýǵa qatysty tekserý júrgizýdi tapsyrdy. 

«Qys bastalmai jatyp, osyndai tótenshe jaǵdai oryn alyp otyr. Barlyq ákim budan qorytyndy shyǵarýy tiis», — dedi Álihan Smaiylov. 

Odan bólek, Premer-Ministr óńirlerdegi energetikalyq obektilerge tolyqtai tehnikalyq aýdit jáne obektilerdiń menshik ielerimen jumys júrgizýdi, sondai-aq «Tarifti investitsiiaǵa aiyrbastaý» baǵdarlamasy aiasynda kommýnaldyq kásiporyndardan kelip túsetin árbir ótinimdi muqiiat zertteýdi tapsyrdy.

«Turǵyn úi-kommýnaldyq sharýashylyǵynyń infraqurylymyn jańǵyrtýǵa jáne jóndeýge bólinetin qarajattyń naqty, maqsatty jumsalýyn qatań baqylaýǵa alý kerek. Jalpy ákimder jylý berý maýsymyn turaqty jeke baqylaýda ustaýy kerek», — dep túiindedi Smaiylov.