Keshe Ekibastuzda volonterler, politsiia qyzmetkerleri men qamqorshylyq organdary ash qalǵan tórt balany anyqtady. Berekesiz otbasy týraly politsiiaǵa kórshileri habarlaǵan, dep jazady Sputnik Qazaqstan.
Kórsetilgen mekenjaiǵa kelgen tiisti organ ókilderi jeti, bes, tórt jáne úsh jastaǵy balalardyń aýyryp jatqanyn anyqtady. Olardyń biriniń ishi úlkeiip ketse, biri eki kúnnen beri qusyp jatqany belgili boldy. Úide tamaq bolmaýyna bailanysty balalar úsh kúnnen beri nár tatpaǵan. Tipti balalardyń báriniń kiimi, aiaq kiimi bolmaǵan.
Volonterler úidegi bar kiimdi kigizip, jedel jrdem shaqyrǵannan keiin balalar anasymen birge shuǵyl túrde aýrýhanaǵa jetkizildi. Oblystyq balalar aýrýhanasyna jatqyzylǵan qyz baladan koronavirýs, qalǵan úsh uldan pnevmoniia anyqtaldy.
Balalar durys tamaqtanbaǵan, dalaǵa shyqpaǵan jáne Maýgli sekildi adamdardan qorqyp ósken. Analarynyń aitýynsha, olardyń jaǵdaiy nasharlap, bir jyl buryn júre almai qalǵan.
Maýgli-balalardyń anasy 1994 jyly týǵan, al ákesi "Bogatyr Kómir" JShS kómir óndirýshi kásiporynnyń merdiger mekemeleriniń birinde jumys isteidi. Otbasy únemi kóship-qonyp júrgen.
"Qazir basty másele – balalardyń densaýlyǵy. Anasy balalarmen birge, olar anasynyń qamqorlyǵyna, kútip-qaraýyna zárý. Balalar qalai mundai kúige túskenin anyqtaǵannan keiin áke-sheshesin ata-ana quqyǵynan aiyrý týraly másele kóteremiz", - dedi Ekibastuz qalasy ákiminiń orynbasary Máriiam Málikova.
Ákimdik balalardyń anasy ishimdikke salynbaǵanyn jáne esepte turmaitynyn habarlady.
Osy oqiǵadan keiin volonterler pavlodarlyqtardan berekesiz otbasylar týraly habarlaýdy suraǵan. Aqparat taraǵannan keiin kóp keshiktirmei-aq óńirdegi aýyldardyń birinde ishimdikke salynǵan áiel bir jastaǵy balasyn spirtti ishimdikti turaqty tutynatyn óz ata-anasymen birge jii qaldyratyny týraly habar tústi. Sondai-aq bul otbasy joǵaryda atalǵan Maýgli-balalardyń týysy bolyp shyqty.
"Bir jastaǵy balanyń anasy úlken balalaryna qatysty ata-ana quqyǵynan aiyrylǵan. Ol Ekibastuzdaǵy Maýgli-balalardyń anasynyń týǵan ápkesi ekeni anyqtaldy", - dep habarlady volonterler.
Olar tez arada qamqorshylyq organdarymen habarlasyp, jedel top tiisti mekenjaiǵa jetti. Bir jastaǵy bala aýrýhanaǵa, onyń anasy politsiia ýchaskesine jetkizildi. Volonterler jedel áreket etkeni úshin pavlodaryq politsiia qyzmetkerlerine alǵys bildirdi.
