Foto: ashyq derekkózden
Kelesi jyldyń birinshi toqsanynda Ekibastuz jylý elektr ortalyǵyna aýdit júrgiziledi. Tek sodan keiin ǵana memleketke qaitarý máselesi týraly sheshim qabyldanady. Bul týraly birinshi vitse-premer Roman Skliar málimdedi, dep habarlaidy Sputnik Qazaqstan.
Úkimet úiinde ótken baspasóz máslihatynda Skliar oligarh Klebanovtyń Ekibastuz JEO-ny memleketke 1 teńgege satý týraly usynysyna pikir bildirdi.
"Ekibastuz JEO-nyń menshik ieleri memleketke 1 teńgege qaitarýdy usyndy. Biraq bizge mynany túsiný qajet: olar ony qandai kúide qaitarady? Qujattarda kórsetilgen qarajattyń bári syrtqa shyǵarylmai, shynymen osy jylý elektr ortalyǵyna jumsaldy ma? Sondyqtan bizge muqiiat aýdit júrgizý qajet. Kelesi jyldyń birinshi toqsanynda aýdit júrgizemiz. Osydan keiin ǵana ony memleketke qaitarý boiynsha sheshim qabyldanady", - dep jaýap berdi Skliar.
Onyń aitýynsha, qazir JEO-da reviziia júrgizilip jatyr. Osy oraida Skliar qaladaǵy tótenshe jaǵdaidy Ekibastuz tarihyndaǵy iri apat dep atady.
"Kúrdeli jóndeýge qansha investitsiia baǵyttalǵany tekserilip jatyr. Qaǵaz júzinde barlyq jylý jelisiniń beriktigi tekserilgen. Ony júrgizgen jaýapty laýazymdy tulǵanyń qoly qoiylǵan. Biraq soǵan qaramastan, jylý jelilerinde Ekibastuz tarihyndaǵy iri apat boldy", - dedi vitse-premer.
Apat sebepterin energetikalyq qadaǵalaý komiteti men quqyq qorǵaý organdary anyqtap jatyr. Olar keiin tergeý qorytyndysyn jariialaidy.
