Ómirde ne bolmaidy deisiz. Ártúrli adam sengisiz oqiǵalar oryn alyp jatady. Taǵdyrdyń taramys joldary talai jandardy tepkige salady. Ómirde bolǵan bir oqiǵa baiandap bereiin. Áńgime gazet betinde jariialanǵan…
Ájemniń aýylynda, bir otbasynda anasy men balasy turypty. Jigittiń ózgelerden ereksheligi, birinshiden garmondary keremet oinaidy, ekinshiden letargiialyq uiqyǵa jii ketip, aptalap, tipti eki aptadai uiyqtaidy eken. Anasy osyny biletindikten mundaida qatty ýaiymǵa salynbaityn kórinedi. Sodan bir kúni jigit úsh apta boiy uiyqtap, oianbaidy. Sol bir jyldary aýylda dáriger ataýly bolmaǵan eken. Sondyqtan aýyl adamdary aýyra qalsa, Ania degen ájeidi emshi sanap, barlyǵy sodan keńes alypty. Úsh apta uiyqtaǵan jigittiń qatty júdep, solyp qýarǵan túrin kórgen Ania ájei ony óldige sanaidy. Barlyǵy onyń sózine qulaq asyp, jigitti qara jerdiń qoinyna tapsyrady. Odan ózge eshkimi joq ana, ólgen balasyna bar jaqsysyn kiindirip, qolyna altyn saǵatyn taǵyp, janyna garmonyn qoiady. Muny bilgen qaraqshylar túnde jigittiń qymbat zattaryn alý úshin molany qazyp, tabytty syrtqa alyp shyǵady. Ainalada eshkim joq ekenine kóz jetkizgen qaskóiler tabyttyń shegelerin bir-birlep sýyra bastaidy. Sońǵy eki-úsh shege qalǵanda, adamnyń yńyranǵan daýysy esitiledi. Jan-jaqqa qaraidy, eshkim joq. Qaraqshylar aqyryn qulaqtaryn tabytqa tosady. Yńyranǵan daýys tabyt ishinen shyǵyp turǵanyn estip, qaraqshylar aldy-artyna qaraýǵa shamasy kelmei qasha jóneledi.
Jigit dál sol sátte uzaq uiqydan oianǵan eken. Bálkim Allanyń ámiri solai bolǵan shyǵar, kim bilsin? Ol tabyttyń qaqpaǵyn ashyp, tysqa shyǵady. Bolǵan jaidan beihabar jigit uiqydan oiandym eken dep, ornynan turyp, qolyna garmonyn alyp, tún ortasynda úiine keledi. Esik qaqsa anasy ashpaidy. Ol óziniń uly ekenin aityp qansha jalynsa da senbei, esikti ashpaidy. Anasy eles mazalap kelip tur degen oimen: «Joǵal bul aradan áitpese atamyn» -dep aiǵai salady. Sol kezde uly garmonmen anasy súiip tyńdaityn ánderdi oryndai bastaidy. Alaida kóńili odan ármen jabyrqaǵan ana myltyqtyń shúrippesin basyp jiberedi. Tún ortasynda jalǵyz dalaǵa shyǵýǵa qorqyp, áiel tańnyń atýyn kútedi. Túndi uiqysyz ótkizgen áiel tań atysymen esik aldyna shyǵady. Sol kezde ǵana túnde úige kelgen eles emes ekenine kóz jetkizedi.
Biraq bári de kesh edi. Jalǵyz uly esik aldynda qanǵa boialyp jatady, janynda garmon. Sonda baryp, óziniń orny tolmas qatelik jasaǵanyn biledi. Sol mezette áielidiń shashy aǵaryp ketedi. Ulyn qaitadan jerlegen soń ózi de bul dúniede kóp turaqtamapty. Kóp uzamai, ulynyń beiitiniń janynda ólip jatqan áieldi aýyldastary taýyp alǵan eken.
