Eńbek jáne halyqty áleýmettik qorǵaý ministrliginiń deregi boiynsha elimizde ekinshi dúniejúzilik soǵysqa qatysqan 289 ardager bar. QazAqparat osy ardagerlerge ár oblys Jeńis kúni qarsańynda qandai kómek usynatynyna sholý jasady.
Nur-Sultanda 18 ardager turady. Olar Jeńis kúnine orai 1 mln teńgeden astam birjolǵy tólem alady.
Almatyda 62 soǵys ardageri jáne osy sanatqa teńestirilgen Damansk soǵysynyń 13 ardageri turyp jatyr. Merekede olardyń árqaisysyna 1 mln teńge beriledi.
Shymkenttik 7 ardager de Jeńis merekesine orai 1 mln teńgeden birjolǵy kómek alady. Sondai-aq, tyl ardagerleri men ekinshi dúniejúzilik soǵysqa qatysýshylardyń jesirlerine 36 756 teńgeden tólenedi. Al, Aýǵan soǵysyna, tájik-aýǵan shekarasyndaǵy, Taýly Qarabaqtaǵy, Iraktaǵy qaqtyǵystarǵa, Semei poligony, Chernobyl atom elektr stansasyndaǵy jumystarǵa qatysýshy sanatyndaǵy 2165 adamǵa 110 268 teńgeden beriledi.
Aqmola oblystyq ardagerler keńesiniń tóraǵasy Ǵosman Tóleǵuldyń aitýynsha, óńirde 10 soǵys ardageri bar. Olardyń árbireýine 1 mln teńge birjolǵy áleýmettik kómek kórsetiledi.
Aqtóbe oblysynda 8 soǵys ardageri qalǵan. Árqaisysyna 2 mln teńgeden beriledi.
Almaty oblysynda ekinshi dúniejúzilik soǵysqa qatysqan 26 ardager bar. Olardyń árqaisysyna 1 mln teńge berý kózdelgen.
Atyraý oblysynda kontslagerde tutqynda bolǵan 1 adam bar. Oǵan 1 mln teńge kómek beriledi.
Batys Qazaqstandaǵy 21 soǵys ardagerine de 1 mln teńgeden beriledi.
Jambyl oblysynda 26 ardager men soǵys múgedegi bar. Olarǵa da Jeńis kúnine orai 1 mln teńgeden birjolǵy áleýmettik kómek kórsetildi.
Qaraǵandy oblysyndaǵy 25 ardagerge 1 million teńgeden beriledi.
Qostanai oblysynda 35 ardager turady. Merekelik kúnge olardyń árqaisysyna 1 million teńge mólsherinde birjolǵy áleýmettik tólem berildi. Sonymen qatar, biyl soǵys ardagerlerine teńestirilgen basqa da sanattarǵa tólemder somasy ulǵaityldy.
Qyzylorda oblysynda ekinshi dúniejúzilik soǵystyń 7 qatysýshysy bar. Olarǵa oblystyq biýdjetten 1 mln teńgeden, al jergilikti biýdjetten 122,5 myń teńgeden birjolǵy áleýmettik kómek bólindi.
Mańǵystaý oblysy jumyspen qamtýdy úilestirý jáne áleýmettik baǵdarlamalar basqarmasynyń basshysy Áset Shopanovtyń aitýynsha, óńirde soǵystyń 6 ardageri turady. Jyl basynan beri olarǵa kommýnaldyq qyzmetterdi óteý úshin 202 myń teńge tólengen. Sondai-aq, jergilikti biýdjetten birjolǵy kómek retinde árqaisysyna 1 mln teńge tólendi.
«Ekinshi dúniejúzilik soǵys ardagerlerine teńestirilgen 774 ardagerge 40-60 ailyq eseptik kórsetkish aralyǵynda bir jolǵy materialdyq kómek kórsetiledi. Qorshaýdaǵy kezeńde Leningrad qalasynyń kásiporyndarynda, mekemeleri men uiymdarynda jumys istegen jáne «Leningradty qorǵaǵany úshin» medalimen nemese «Qorshaýdaǵy Leningrad turǵyny» belgisimen marapattalǵan 1 azamatqa 153 150 teńge, burynǵy kontslagerlerde, geotolarda jáne basqa da májbúrlep ustaý oryndarynda kámeletke tolmaǵan tutqyn bolǵan 3 adamǵa 153 150 teńgeden, ekinshi dúniejúzilik soǵystyń múgedekterine teńestirilgen adamnyń ekinshi, biraq nekege turmaǵan jubailary – 26 adamǵa 122 520 teńgeden berildi», - dedi Áset Shopanov.
Sondai-aq, ekinshi dúniejúzilik soǵys ardagerlerine teńestirilgen 1 adamǵa 153 150 teńge, ekinshi dúniejúzilik soǵystyń múgedekterine jeńildikteri jaǵynan teńestirilgen 49 adamǵa 183 780 teńgeden, ekinshi dúniejúzilik soǵys jyldarynda tyldaǵy eńbegi jáne áskeri qyzmeti úshin nagradtalǵan 574 adamǵa 122 520 teńgeden, qaza tapqan áskeri qyzmetshilerdiń otbasylaryndaǵy 56 otbasy 122 520 teńgeden, basqa memleketterdiń aýmaǵyndaǵy urys qimyldarynyń múgedek ardagerleri - 64 adamǵa 183 780 teńgeden tólenbek.
Pavlodar oblysynda soǵystyń 18 ardageri turyp jatyr. Jeńis kúnine orai, olarǵa 2 mln teńge kóleminde bir rettik materialdyq kómek kórsetiledi.
Soltústik Qazaqstan oblysynda 15 ardager bar. Olarǵa da 1 mln teńgeden birjolǵy kómek bólingen.
Túrkistan oblysyndaǵy 22 ardagerge de 1 mln teńgeden kómek kórsetilmek.
Túrkistan oblysy ákimi baspasóz qyzmetiniń málimeti boiynsha, búginde Túrkistan oblysynda 5301 soǵys ardageri men olarǵa teńestirilgender turady. Onyń ishinde 22 ekinshi dúiejúzilik soǵys ardageri men soǵys múgedegi bar. Osy eki sanatqa teńestirilgender sany 154 bolsa, tyl eńbekkerleriniń sany – 5125. Ekinshi dúniejúzilik soǵys qatysýshylary men múgedekterine teńestirilgenderge 30-100 myń teńge aralyǵynda bir rettik materialdyq kómek berilip jatyr.
Shyǵys Qazaqstan oblysynda 42 soǵys ardagerine 1,5 mln teńgeden beriledi.
