Sýret ashyq derekkózden alyndy
Ulytaý jáne Batys Qazaqstan oblystarynda «Aýyl – el besigi» ulttyq jobasyna bólingen qarjyny igerý jáne jobalardy iske qosý deńgeii tómen. QR Premer-Ministri Álihan Smaiylov Úkimet otyrysynda atalǵan óńir ákimderine naqty tapsyrma berdi, dep habarlaidy QazAqparat agenttigi.
«Aýyl – el besigi» jobasyn iske asyrý úshin aýqymdy jumystar atqarylyp keledi. 2027-shi jylǵa qarai áleýeti joǵary 3,5 myń aýyldyń bárin óńirlik standarttar júiesine sai damytý josparlanyp otyr.
Oǵan sáikes, aýyldarda sapaly joldar men mádeniet, sport jáne densaýlyq saqtaý obektileri, mektepter mindetti túrde bolýy tiis, sondai-aq aýyl infraqurylymyn damytýǵa basa mán beriledi. Bizdiń basty maqsatymyz – aýyldaǵy ómir sapasyn jaqsartý», - dedi Premer-Ministr.
Onyń paiymynsha, aýyldardy damytýǵa baǵyttalǵan sharalardyń aqty nátijesi kóńil kónshitpeidi.
«Ótken jyldary «Aýyl – el besigi» jobasy sheńberinde turǵyn-úi kommýnaldyq sharýashylyq, kólik, bilim berý, densaýlyq saqtaý, mádeniet jáne sport salalary boiynsha jalpy quny 326 mlrd teńge bolatyn 3,6 myń joba iske asyryldy.
Atyraý, Qostanai, Soltústik Qazaqstan, Túrkistan oblystarynda bólingen qarajatty igerý jáne jobalardy paidalanýǵa berý qarqyny jaqsy.
Al, keibir óńirlerde bul jumys aqsap tur. Máselen, Ulytaý jáne Batys Qazaqstan oblystarynda qarjyny igerý jáne jobalardy iske qosý deńgeii tómen. Atalǵan óńir ákimderi «Aýyl – el besigi» jobasyn iske asyrýǵa erekshe nazar aýdarýy tiis. Ásirese, jobalardyń ýaqytyly oryndalýyn qatań baqylaýǵa alý kerek», - dedi Álihan Smaiylov.
