Qasym-Jomart Toqaev pen Mýn Chje In BAQ ókilderi úshin brifing ótkizdi, dep habarlaidy "Ult aqparat" Aqordanyń resmi saityna silteme jasap.
Qasym-Jomart Toqaev Koreia Respýblikasyna shaqyryp, shynaiy yqylaspen qarsy alǵany úshin Prezident Mýn Chje Inge rizashylyq bildirip, bul memlekettik saparǵa erekshe mán beretinin atap ótti.
– Eki eldiń arasy alshaq bolǵanymen, halyqtarymyz – taǵdyrlas. Koreia – Qazaqstannyń Shyǵys Aziiadaǵy strategiialyq seriktesiniń biri. Qazir san salaly bailanysymyz qarqyndy damyp kele jatyr. Biz búgin osy qarym-qatynasty jańa deńgeige kóterý úshin ózara senim men qoldaýǵa negizdelgen kelissózder júrgizdik. Yqpaldastyqtyń tyń baǵyttaryn aiqyndadyq, – dedi Qazaqstan Prezidenti.
Memleket basshysy ótken ǵasyrdaǵy tarihi oqiǵalardyń eki halyqty jaqyndata túskenine toqtaldy.
– Ondaǵan myń korei qazaq jerinen pana tapty. Qazaqstan olardyń ekinshi Otanyna ainaldy. Korei jurtynyń ulttyq batyry, general Hon Bom Do Qyzylorda qalasynda jerlengenin jaqsy bilesizder.
Prezident Mýn Chje Inniń ótinishimen onyń súiegi meniń sheshimimmen týǵan jerine jetkizildi. Bul shara – bizdiń elderimizdiń arasyndaǵy ózara senimniń jarqyn kórinisi. Kezinde Qazaqstanǵa jer aýdarylǵan koreilerdiń urpaǵy búginde 100 myńnan asty. Olar memleketterimizdiń dostyq qatynasyn nyǵaita túsýge zor úles qosyp keledi, – dep atap ótti Qasym-Jomart Toqaev.
Memleket basshysy brifingte óńirlik jáne halyqaralyq máseleler boiynsha pikir almasyp, negizgi túitkilderdi talqylanǵandaryn, sondai-aq, birneshe mańyzdy kelisimge qol qoiylǵanyn aitty.
– Qazaqstan Koreiamen seriktestikti jan-jaqty damytýǵa basa mán beredi. Biz ózara tiimdi áriptestikti joǵary baǵalaimyz.
Yntymaqtastyqty tyń qarqynmen jalǵastyrýǵa múddelimiz. Búgin qabyldanǵan Keńeitilgen strategiialyq seriktestik týraly birlesken málimdeme – sonyń aiqyn dáleli. Bul qujat qazaq-korei yqpaldastyǵynyń aiasyn keńeitip, qarym-qatynasymyzdy jańa beleske kóterýge septigin tigizedi dep senemin. Ekijaqty bailanystardyń ózegi – saýda-ekonomikalyq yntymaqtastyq.
Koreia – joǵary tehnologiiasy men innovatsiialyq ónerkásibi damyǵan qýatty memleket. Qazaqstan – ekonomikalyq ósimi turaqty, ári investitsiialyq ahýaly qolaily el. Qazirdiń ózinde «Tańǵy shyq eli» Aziiadaǵy saýda seriktesterimizdiń ishinde ekinshi orynda tur. Buǵan qosa, Koreia elimizdegi eń iri 10 investordyń qataryna kiredi, – dedi Qazaqstan Prezidenti.
Qasym-Jomart Toqaev sońǵy 15 jylda Koreia Qazaqstan ekonomikasyna 6 milliard dollardan astam investitsiia salǵanyn, «Samsung», «Hyundai» jáne «Lotte Group» kontsernderi – bizdiń iri investorlarymyz ekenin atap ótti.
– Ótken jyldyń qorytyndysy boiynsha eki eldiń saýda-sattyq kólemi 5,9 milliard dollarǵa jetti. Aldaǵy meje – osy kórsetkishti aitarlyqtai arttyrý. Búgin biz pandemiiadan keiingi kezeńde shikizattyq emes taýar ainalymyn ulǵaityp, ony ártaraptandyrýǵa kelistik. Sondai-aq, «Samal jel» baǵdarlamasyn jandandyrýǵa ýaǵdalastyq. Osy arqyly jańa investitsiia men joǵary tehnologiianyń elimizge kelýine qolaily jaǵdai jasaimyz.
Biz túrli baǵyttaǵy aýqymdy jobalardy birlese júzege asyrýdyń múmkindikterin qarastyramyz. Bul rette, aýyr ónerkásip pen mashina jasaý, taý-ken jáne barlaý, balamaly energetika salalarynyń bolashaǵy zor. Qazaqstanda innovatsiialyq óndiristerge degen suranys joǵary. Ásirese, kommýnikatsiia, aýyl sharýashylyǵy, meditsina jáne farmatsevtika jobalaryna basa mán beremiz, – dedi Memleket basshysy.
– Bul – seriktestigimizdi strategiialyq rýhta damytýdyń taǵy bir joly. Kelesi jyly Qazaqstan men Koreianyń diplomatiialyq qatynas ornatqanyna 30 jyl tolady. Osy oraida biz mádeni-gýmanitarlyq bailanystardy kúsheitip, naqty is-sharalar ótkizý mańyzdy ekenin atap óttik, – dedi Qasym-Jomart Toqaev.
