Batys Qazaqstan oblysynda mas júrgizýshi jol jiegimen kele jatqan eki áieldi qaǵyp, olardyń birin mert qylǵan. Jol-kólik oqiǵasynan keiin júrgizýshi oqiǵa ornynan qashyp ketken, dep habarlaidy ult.kz.
Apat 8 qyrkúiek kúni saǵat 23:00 shamasynda Krýgloozernoe aýylynda bolǵan. Lada Priora kóliginiń júrgizýshisi jol jiegimen kele jatqan eki áieldi qaǵyp, toqtamastan oqiǵa ornynan ketip qalǵan.
Jol-kólik oqiǵasy saldarynan áielderdiń biri qaza tapty. Ekinshisi túrli jaraqatpen aýrýhanaǵa jetkizildi.
Politsiia júrgizýshiniń jeke basyn anyqtap, ony ustady. Meditsinalyq kýálandyrý kezinde onyń jol apaty bolǵan sátte alkogoldik mas kúide bolǵany anyqtaldy. Kúdikti qamaýǵa alyndy.
Aldyn ala málimet boiynsha, zardap shekken áielder anasy men qyzy bolǵan. Qaza tapqan áieldiń 31 jasta bolǵany týraly aqparat bar. Alaida bul derek ázirge resmi túrde rastalmaǵan.
Atalǵan fakti boiynsha qylmystyq is qozǵalyp, tergeý júrgizilip jatyr.
