Eýropa qaita qurý jáne damý bankiniń vitse-prezidenti Betsi Nelson Qazaqstannyń bolashaǵy zor ekenin aitty, dep habarlaidy QazAqparat.
«Bul elge qarap turyp, onyń bolashaǵyn, ósimin kóremin. EQDB elderińizdiń ósimine úles qosý úshin ne istedi? Biz álemniń 30 elinde jumys istep, BAQ-pen, jeke sektormen ózara is-qimyldy júzege asyramyz. Konsýltatsiialyq jumys júrgizip, ekonomikalyq departamenttermen jumys isteimiz. Qarjy institýttarymen kóptegen máselelerdi qarastyramyz jáne bul áielderdiń maqsatyna jetýine septigin tigizedi. Jeke sektorda Almatyda júzege asyryp jatqan jobalarymyz da bar. Bul jobany júzege asyrý barysynda genderlik aspektige nazar aýdaryp, áielderdiń qatysýyna basa mán beremiz», - dedi ol elordada ótip jatqan II Qazaqstannyń aýyl áielderi forýmynda.
Onyń atap ótýinshe, áielder bul ómirde belgili bir múmkinshilikterdi ala almai otyr. Iaǵni, erterekte tek erkekter ǵana ainalysýy tiis delinetin salalarǵa qatysa almaýda.
«Biz mundai múmkindikterdi zerdeleimiz. Máselen, áielder traktor júrgizýshisi bolyp jumys istei ala ma? Eger sizdiń traktor júrgizýge litsenziiańyz bolmasa, onda siz bul saladan tys qaldyńyz degen sóz. Siz avtobýs ta júrgize almaisyz. Demek bul indýstriiadan da tys qalyp otyrsyz. Sondyqtan olardyń ózderi bul salada jumys istegisi kelmeidi degen oi qalyptasqan. Biz Úkimetke júgingennen keiin qazir Almaty kóshelerinen avtobýs júrgizgen áielderdi kóre alasyzdar. Búginde Úkimet bizben birge qaita qaralýy tiisti zańdardy qarastyryp jatyr. Jáne de biz áielder ala almai kelgen mamandyqtardy qaraimyz. Úkimetke zańnamany qaita qaraýǵa týra keledi jáne biz bul rette naqty tabysqa qol jetkizemiz», - dedi EQDB vitse-prezidenti.
