© Sputnik / Timýr Batyrshin
Tsifrlyq damý, innovatsiialar jáne aeroǵarysh ónerkásibi ministrligi elektrondy úkimet portaly arqyly 10 sotyq jerge ótinish ne sebepti qabyldanbai jatqanyn túsindirdi, dep habarlaidy Sputnik Qazaqstan.
"Ótken aptada biz jeke turǵyn úi qurylysy úshin jer telimin alý boiynsha kezekke turý qyzmetin testtik rejimde engizdik. Al 8 sáýirde resmi túrde iske qostyq. Sodan beri osy qyzmetti onlain-formatta 100 myńnan astam ret paidalandy. Buǵan deiin biz kezekte turǵan 1,3 adamdy tsifrlyq formatqa aýystyrdyq", - deidi ministrlik mamandary.
Biraq úsh aimaqta adamdardyń ótinishi ýaqytsha qabyldanbaidy. Sebebi jergilikti bilik jer kezegin retke keltirip úlgermedi.
"Bul qyzmet úsh aimaqta qoljetimsiz bolýy múmkin. Sebebi ákimdikter kezekke turǵyzýdy ýaqytsha toqtatýdy surady. Olar derekterdi qaita tekserip jatyr. Ótinish qabyldanbai jatsa, E-Ótinish arqyly jergilikti atqarýshy organnan túsinikteme alýǵa bolady", - deidi qyzmetkerler.
Aita keteri, buǵan deiin qazaqstandyqtar kezekke turý úshin ákimdikterge qaǵaz júzinde ótinish tapsyratyn, onda kezek retiniń durys júrgizilmeý qaýpi bolatyn.
Ol kezde kezekke turý protsesi 12 kún ýaqyt alatyn. Bul ótinishter 16 jyl boiy aýdan, qala, oblys deńgeiinde bólek-bólek saqtaldy.
Al jańa júieniń arqasynda qazaqstandyqtar kezekke turyp, eGov.kz-te onyń jyljý barysyn óz betinshe baqylap, jer kezegine budan buryn berilgen ótinishtiń derekterin ózektendire alady.
Osylaisha árbir qazaqstandyq alýǵa tiis 10 sotyq jerdi alý protsesi barynsha ashyq bolady. Al avtomatizatsiia arqasynda bul protseske 5 minýt qana jumsalady.
