Efiopiia premer-ministri Abii Ahmed 2019 jylǵy beibitshilik salasyndaǵy Nobel syilyǵyna ie boldy. Laýreattyń esimi 11 qazanda Osloda jariialandy.
Ahmedke bul syilyq «Beibitshilikti ornatýǵa qosqan úlesi úshin» jáne «Halyqaralyq yntymaqtastyqqa qosqan úlesi úshin», iaǵni Efiopiia men Eriteriia arasyndaǵy qaqtyǵysty rettegeni úshin berildi.
Byltyr Ahmed premer-ministr bolyp sailanǵan soń Eriteriia biligimen kelisimge kelip, 20 jylǵa sozylǵan qaqtyǵysqa núkte qoiǵan.
1993 jyly Eriteriia Efiopiiadan táýelsizdik alǵan. Al 1998 jyly eki el arasynda jerge talas bastalǵan. Qaqtyǵys eki jylǵa sozylǵan edi. International Crisis Group dereginshe, bul qaqtyǵystan 70 myńnan 100 myńǵa deiin adam mert bolǵan. 2018 jyly Ahmed daýly jerdi Eriteriiaǵa bergen.
Biyl Beibitshilik boiynsha Nobel syilyǵyna 223 adam men 78 uiym úmitker bolǵan. Úmitkerlerdiń tolyq tizimi men jeńimpazdyń esimi sońǵy sátke deiin qupiia saqtaldy.
Sarapshylar somalilik Ilvad Elmandy, liviialyq Hadjer Sharifti, gonkongtik belsendi Natan Laýdy, shvetsiialyq ekobelsendi Greta Týnbergti favorit sanaǵan.
Byltyr beibitshilik salasyndaǵy Nobel syilyǵyn kongolyq hirýrg Deni Mýkvege men siriialyq quqyq qorǵaýshy Nadia Mýrad alǵan.
