Búgin májilismender «Eýraziialyq ekonomikalyq odaqta taýarlardy sáikestendirý quraldarymen tańbalaý týraly kelisimdi ratifikatsiialaý týraly» QR Zań jobasyn maquldady.
Zań jobasymen tanystyrǵan QR Qarjy ministri Álihan Smaiylov atalǵan kelisimge 2018 jyldyń 2 aqpanynda Almatyda ótken Eýraziialyq úkimetaralyq keńestiń otyrysy sheńberinde EvrazEO elderiniń premer-ministrleri qol qoiǵanyn eske saldy.
«Kelisimniń negizgi maqsattary - taýarlar ainalymynyń zańdylyǵyn qamtamasyz etý, tutynýshylardyń quqyǵyn qorǵaý, kóleńkeli ekonomikany azaitý, biýdjetke salyqtardyń túsimin arttyrý, odaq sheńberinde biznesti júrgizýdegi básekelestik sharttaryn teńestirý. Kelisimniń erejesi tańbalaý engizýdiń tártibi men merzimin belgileýdi, taýarǵa sáikestendirý quraldarynyń jáne olardy taýarlarǵa jelimdeý birińǵai talaptaryn, Eýraziialyq ekonomikalyq odaqqa múshe-memleketter arasynda tańbalanǵan taýarlar týraly beriletin málimetterdiń qurylymy men quramyn retteidi. Kelisim boiynsha kedendik odaq aýmaǵyna ákelingen jáne Odaq aýmaǵynda óndirilgen taýarlar tańbalanýǵa jatady. Bul rette, taýarlardy kedendik Odaq aýmaǵynan tysqary jerlerde de tańbalaýǵa ruqsat etiledi», - dedi Smaiylov.
Ministrdiń aitýynsha, tańbalanatyn taýarlardyń tizbesi odaqqa kiretin elderdiń usynysy boiynsha Eýraziialyq ekonomikalyq komissiia keńesimen biraýyzdan bekitiledi. Ol úshin tańbalaý engizýdiń maqsatqa sai ekendigi týraly tolyq taldaý usyný qajet.
«Odaq aýmaǵynda jeke taýarlar toptamasyna tańbalaý engizý týraly ortaq sheshim qabyldanǵan jaǵdaida, bastamashy memleket óziniń zańnamasyna súiene otyryp tańbalaý engizýge quqyǵy bar. Bul rette, basqa múshe-memleketter ózderiniń nietteri paida bolǵan kezde osyndai tańbalaýǵa qosyla alady. Keibir jaǵdailarda taýarlar tańbalaýǵa jatpaidy. Mysaly óndirilgen taýarlardy Odaqtyń kedendik aýmaǵynan syrtqa shyǵarǵan jaǵdaida jáne jeke tulǵalardyń óz qajettiligi úshin ákelgen taýarlardy tańbalaýdyń qajeti joq. Aita ketetinim, búgingi tańda tańbalaý institýty álemniń kóptegen damyǵan elderinde, máselen AQSh, EO elderi, Braziliia, Qytai jáne basqa memleketterde oidaǵydai qoldanylýda», - dedi Álihan Smaiylov.
Vedomstvo basshysynyń aitýynsha, taýarlardyń árbir birligin tańbalaý jáne ony importtaýshydan jáne óndirýshiden bastap sońǵy tutynýshyǵa deiin qadaǵalaý ekonomikany tsifrlandyrýdyń tiimdi quraldarynyń biri sanalady. Buǵan qosa, kelisimdi iske asyrý respýblikalyq biýdjetten qarjy shyǵynyn qajet etpeidi.
