Qazaqstan Prezidenti Qasym-Jomart Toqaevtyń Eýraziia ekonomikalyq odaǵynyń (EAEO) 2025 jylǵa deiingi damý strategiiasynyń jobasyna qatysty aitqan barlyq eskertpeleri men usynystary talqylanyp, kelisilgen sheshimder qabyldandy. Bul týraly búgin brifing barysynda Eýraziia ekonomikalyq komissiiasy (EEK) alqa tóraǵasynyń kómekshisi Iia Malkina málimdedi, dep habarlaidy «QazAqparat» HAA-nyń menshikti tilshisi.
«Strategiia belsendi túrde pysyqtalyp, komissiia barlyq taraptardyń pikirine úlken kóńil bóledi. Onyń ishinde Qazaqstan Prezidenti atap ótken máseleler talqylanyp, olar boiynsha múshe-memleketterdiń kelisilgen sheshimderi ázirlendi», - dedi ol.
«Jalpy alǵanda, qyrkúiek aiynda Komissiia keńesiniń otyrystarynda 28 tarmaq boiynsha sheshim qabyldandy. Memleket basshylarynyń qaraýyna usynylatyn qorytyndy qujatty ázirleý úshin osy jyldyń 9 qazanynda Eýraziialyq úkimetaralyq keńeste birqatar ózekti máseleni qaraý josparlanýda», - dedi I. Malkina.
EEK alqa tóraǵasynyń kómekshisi sondai-aq, EAEO-nyń quqyqtyq portalynda birlestiktiń birqatar jobalary talqylanyp jatqanyn habarlady. «Kez kelgen azamat jáne biznes ókili óziniń saraptamalyq pikirin qaldyra alady. Osylaisha komissiiaǵa biznestiń, tutynýshynyń jáne memlekettiń kóńilinen shyǵatyn sapaly qujat jasaýǵa kómektesedi», - dep atap ótti Malkina.
Atap aitqanda, RF aýmaǵyna astyq jinaityn kombaindardy ýaqytsha kirgizýdi kúntizbelik 10 kúnge deiin qysqartý usynysy qamtylǵan sheshim jobasy 4 qazanǵa deiin talqylanady. Sondai-aq 8 qazanǵa deiin memlekettik satyp alý maqsattary úshin Eýraziialyq ónerkásiptik ónimniń tizilimin qalyptastyrý jáne júrgizý tártibi talqylaýda bolady. Al 16 qazanǵa deiin energiia tutynatyn qurylǵylardyń energetikalyq tiimdiligindegi talaptar týraly tehnikalyq reglamenttiń kúshine ený kúnin bir jylǵa aýystyrý týraly sheshim jobasynyń jariia talqylaýy ótedi.
