EAEO memleketteriniń tehnoparkteri bir jobany bastaý úshin birigýi múmkin. Ol týraly «Jahandaný dáýirindegi tsifrlyq kún tártibi 2.0» forýmynda QR Aqparat jáne kommýnikatsiialar ministrliginiń vitse-ministri Dinara Sheglova málimdedi, dep xabarlaidy QazAqparat tilshisi.
«Biz byltyrǵy forýmnan bastap EAEO memleketterimen birge jumys isteimiz dep sheshkenbiz. Bul joly tehnoparkterdiń birigýi men innovatsiialyq ekojúie týraly aitamyz. Bul yntymaqtastyq birlesken jobamyzdy iske asyryp, tsifrlyq ekonomikany biz kútkendei deńgeige jetkizýge kómektesedi. Sonymen qatar, birlese otyryp, ǵylymi-zertteý jumystaryn júrgizemiz. Búgin EAEO memleketteri tehnoparkteriniń basyn qosatyn memorandýmǵa qol qoiamyz degen oidamyn», - dedi Dinara Sheglova.
Sondai-aq, spiker «Astana Habtyń» jetistikteri men memleket qyzyǵyp otyrǵan ózge de jobalar týraly aityp berdi.
«Ózderińiz biletindei, astanalyq tehnopark byltyr ashylǵan bolatyn. Bul - Qazaqstan men IT qaýymdastyq úshin aitarlyqtai mańyzdy oqiǵa. Biz osyndai innovatsiialyq jobalardy kópten beri kútken edik. Tabysty jobalarmen akseleratsiondyq baǵdarlama júrgizdik. Eksportqa jumys jasaityn jobalar da bar. Mysaly, Singapýr men Malaiziiada «Astana habtyń» biometriiaǵa qatysty jobasyna kópshilik qyzyǵýshylyq tanytty. Bizdiń startaptar álemniń 100 myqty jobasy kirgen halyqaralyq Aziia olimpiadasyna qatysty. Biz ony Qazaqstannyń startaperleri úshin úlken jetistik dep bilemiz. Akseleratsiondyq baǵdarlama aiasynda investitsiialar kelip jatyr. Jalpy, ol biz úshin óz jobańdy kórsetý ǵana emes, sondai-aq, bir-birimen tájiribe almasý», - dedi ol.
QR Aqparat jáne kommýnikatsiialar ministriniń orynbasary «Astana Hab» baǵdarlamalaryna shamamen 1,5 myń ázirleýshi qatysatynyn jetkizdi. Onyń ishinde 300 adam - turaqty rezidentter.
