Parlament Májilisiniń jalpy otyrysynda «2014 jylǵy 29 mamyrdaǵy Eýraziialyq ekonomikalyq odaq týraly shartqa ózgerister engizý týraly hattamany ratifikatsiialaý týraly» zań jobasy maquldandy, dep habarlaidy "Ult aqparat".
«2014 jylǵy 29 mamyrdaǵy Eýraziialyq ekonomikalyq odaq týraly shartqa ózgerister engizý týraly ratifikatsiialaýǵa usynylǵan hattama «Alǵashqy iri» Hattama bolyp sanalady. Ol boiynsha Eýraziialyq ekonomikalyq odaqqa múshe memleketter sarapshylarynyń birlesken jumysy tórt jyldan astam júrgizildi. Hattama Eýraziialyq ekonomikalyq odaq týraly shartqa túzetýlerdiń úsh blogyn engizýdi kózdeidi», - dedi Saýda jáne integratsiia ministri Baqyt Sultanov.
Birinshiden, básekelestik salasyndaǵy ózgerister qamtylǵan. Eýraziialyq ekonomikalyq odaqqa múshe memleketterdiń sharýashylyq júrgizýshi sýbektileri básekelestik sharttaryn buzǵan jaǵdaida, Komissiiaǵa eskertýler men aldyn ala eskertýler berýge múmkindikter eskerilgen. Aldyn ala eskertý alǵannan keiin sharýashylyq júrgizýshi sýbektiler ereje buzý jaǵdailaryn ózderi joia alady, zardap shekken sýbektiler talaptardy buzǵandarmen kelise alady. Básekelestikke qarsy tájiribe jalǵasqan jaǵdaida, belgilengen aiyppuldar qoldanylatyn bolady.
Ekinshiden, Eýraziialyq ekonomikalyq komissiiaǵa energetika, tehnikalyq retteý, makroekonomika, básekelestik jáne veterinariia salalarynda qosymsha ókilettikter berý qarastyrylǵan. Bul ókilettikter Eýraziialyq ekonomikalyq odaq aiasynda qol qoiylǵan halyqaralyq sharttardyń, onyń ishinde Eýraziialyq ekonomikalyq odaq týraly sharttyń saldary bolyp sanalatynyn jáne Komissiia qyzmetiniń ashyqtyǵyn qamtamasyz etýge baǵyttalǵanyn atap ótý qajet.
«Mysaly, tehnikalyq retteý salasynda Komissiia Keńesine múshe memleketterdi akkreditteý jónindegi organdardyń ózara salystyrmaly baǵalaýdy júzege asyrý tártibin bekitý boiynsha ókilettikter beriledi. Odaqtyń qoldanystaǵy quqyǵynda oǵan sáikes múshe memleketterdi akkreditteý jónindegi organdar ózara salystyrmaly baǵalaýdy júzege asyratyn norma bar ekenin atap ótken jón. Alaida búgingi kúni salystyrmaly baǵalaý júrgizýdiń jeke tártibi bekitilmegen», - dedi B. Sultanov.
Shartta Komissiiaǵa qoldanystaǵy normalardy naqtylaýǵa baǵyttalǵan ókilettikterdi berýge arnaiy túzetýler de bar.
Úshinshiden, tehnikalyq túzetýler qamtylǵan.
«Sharttyń normalaryn praktikada neǵurlym tolyq jáne durys qoldaný maqsatynda Shart boiynsha bes jyldan astam jumys - onyń jeke bólikterin túzetý qajet ekenin anyqtady. Bul negizinen olqylyqtardy joiýǵa jáne Eýraziialyq ekonomikalyq odaq týraly shart erejeleriniń redaktsiiasyn naqtylaýǵa baǵyttalǵan tehnikalyq sipattaǵy túzetýler. Tutastai alǵanda, zań jobasy respýblikalyq biýdjetten qarjy shyǵyndaryn talap etpeidi jáne teris áleýmettik- ekonomikalyq jáne quqyqtyq saldarǵa ákep soqpaidy», - dedi Baqyt Sultanov.
