Parlament Senatynyń jalpy otyrysynda «Eýraziialyq ekonomikalyq odaqtyń kedendik aýmaǵyna ákelingen taýarlardy qadaǵalap otyrý tetigi týraly kelisimdi ratifikatsiialaý týraly» Zańy qabyldandy, dep habarlaidy QazAqparat.
Joǵarǵy Eýraziialyq ekonomikalyq keńestiń 2019 jyldyń 29 mamyrynda Nur-Cultan qalasynda ótken otyrysynda Eýraziialyq ekonomikalyq odaqqa (EAEO) múshe memleketterdiń basshylary kelisimge qol qoidy. Kelisimniń negizgi maqsattary - taýarlar ainalymyna tiimdi baqylaýdy qamtamasyz etý, zańsyz ainalymdy anyqtaý, salyq tóleýden jaltarý jaǵdailaryn boldyrmaý, biýdjetke túsetin salyq jáne keden tólemderin ulǵaitýdy qamtamasyz etý.
«Kelisimniń erejeleri Eýraziialyq ekonomikalyq odaqtyń kedendik aýmaǵyna ákelingen taýarlardy qadaǵalaý tetigin qurý merzimderi men tártibin reglamentteidi. Qadaǵalaý importtyq taýarlar boiynsha júzege asyrylatyn bolady. Qadaǵalaýǵa jatatyn taýarlardyń tizbesin Eýraziialyq ekonomikalyq komissiianyń Keńesi bekitedi. Árbir memleket óziniń Ulttyq qadaǵalaý júiesin qurýy qajet, sondai-aq salyq tóleýshilerdiń ózderiniń ilespe qujattaryn osy júiede resimdeýin baqylaýdy qamtamasyz etýi tiis. Qujattar osy juiede resimdelmese taýarlardy Eýraziialyq ekonomikalyq odaq aiasynda tasymaldaýǵa tyiym salynatyn bolady», - dedi QR Qarjy ministri Erulan Jamaýbaev.
Kelisimde Eýraziialyq ekonomikalyq odaǵyna múshe memleketter arasynda qadaǵalaý jónindegi aqparat almasý boiynsha talaptar aiqyndalǵan. Mundai almasý Eýraziialyq ekonomikalyq odaqtyń integratsiialanǵan aqparattyq platformasy arqyly turaqty túrde júzege asyrylatyn bolady. Taýarlar ainalymyn qadaǵalaý tetigin engizý kezeń-kezeńimen iske asyrylady.
Kelisimdi barlyq múshe memleketter bekitkennen keiin, árbir memleket 120 kúntizbelik kún ishinde qadaǵalaý tetigin úilestirýge jáne iske asyrýǵa jaýapty. Kelisim kúshine engen kúninen bastap 12 aidyń ishinde qanatqaqty joba iske qosylatyn bolady. Pilottyq jobanyń nátijeleri boiynsha, qadaǵalaý júiesiniń turaqty jumys isteýine kóshý týraly sheshim qabyldanady.
