QR Mádeniet jáne sport ministri Aqtoty Raiymqulova e-sport ulttyq sport tuǵyrnamasyn engizýdiń mán-jaiyn aitty, dep habarlaidy QazAqparat.
«Keshendi josparda e-sport tsifrlyq tuǵyrnamasyn engizý kózdelgen. Bul turǵyda sport salasyn tsifrlandyrý úshin biregei múmkindik bar. E-sport tuǵyrnamasy arqyly sport kúntizbeleri, biryńǵai sporttyq klassifikatsiia, qurama komandalardyń quramdary, sportshylar men jattyqtyrýshylardyń, tóreshilerdiń biryńǵai elektrondy bazasy jáne basqa da negizgi qujattar jalpyǵa qoljetimdi bolady» , - dedi ministr Ortalyq kommýnikatsiialar qyzmetindegi onlain baspasóz máslihatynda.
Onyń sózine qaraǵanda, e-sport tuǵyrnamasyn ministrlik Ulttyq aqparattyq tehnologiialar aktsionerlik qoǵamymen birlesip ázirlep, 2020 jyldyń sońyna deiin elimizdiń óńirleriniń birinde qanatqaqty joba retinde synaqtan ótkizip, iske qosýdy qarastyrýda.
Óz kezeginde QR MSM Sport jáne dene shynyqtyrý isteri komiteti tóraǵasynyń orynbasary Asqar Esimov ulttyq tsifrlyq tuǵyrnama keshendi jospardy iske asyrý boiynsha mańyzdy baǵyttardyń biri ekenin atap ótti.
Tsifrlyq tuǵyrnama úsh modýldi qamtyp otyr. Birinshisi - sporttyq sharalardy basqarýǵa arnalǵan, iaǵni sporttyq kúntizbe tolyqtai tsifrlandyrýdan ótedi.
Ekinshi modýl sportshylardyń, tóreshilerdiń, bapkerlerdiń pasporttaryn engizýdi, sondai-aq barlyq memlekettik qyzmetti elektrondy formatta usynýdy eskerip otyr.
Úshinshi modýl aiasynda sporttyq nysandar tsifrlandyrý sharalarymen qamtylyp, sektsiialar týraly barsha aqparat turǵyndarǵa usynylady. Osy oraida bul júie turǵyndar tarapynan qoiylatyn barlyq suraqtarǵa jaýap beredi.
Aita keteiik, Dene shynyqtyrý jáne buqaralyq sportty damytý jónindegi 2020-2025 jylǵa arnalǵan keshendi jospary ázirlendi. Bul josparda múddeli memlekettik organdardyń, jergilikti atqarýshy organdardyń usynystary tolyq eskerilip, QR Premer-Ministrimen bekitildi.
