Eńbek sharttaryn esepke alýdyń biryńǵai júiesi iske qosylǵaly beri 27,1 myńnan astam uiym jáne 1,2 mln tsifrlanǵan shart tirkelgen, onyń 708 myńy júiede tirkelgen sátte qoldanysta bolǵan. Bul jóninde Eńbek resýrstaryn damytý ortalyǵy habarlady.
«Jumys berýshilerdiń E-hr júiesine qatysýy erikti túrde bolady. Qazirgi ýaqytta tartylǵan jumys berýshiler qatarynda 512 iri uiym bar. Biylǵy birinshi jartyjyldyq sońyna deiin biz taǵy 25 myń jumys berýshini tartýdy jáne keminde 750 myń qoldanystaǵy jáne jańa eńbek sharttaryn tirkeýdi josparlap otyrmyz», – dedi «Eńbek resýrstaryn damytý ortalyǵy» AQ derekterdi taldaý jáne óńdeý departamentiniń direktory Baqtiiar Jazyqpaev.
Barlyq elektrondyq eńbek sharttary Eńbek jáne halyqty áleýmettik qorǵaý ministrligi ázirlegen biryńǵai qoimada saqtalady, al avtomattandyrylǵan kadrlyq eseptiń qosymshalary kóp jáne jumys berýshi júiege qosylý úshin ózine yńǵaily IT sheshimdi óz qalaýy boiynsha tańdaidy.
«Jumys berýshilerdiń elektrondyq eńbek sharttaryn paidalaný arqyly olardy jalpy derekqorda tirkeýge múmkindigi bar. Bul azamattardy jumysqa qabyldaý rásimin jeńildetýge jáne jedeldetýge múmkindik beredi, óitkeni qujattardy qoldan jasaý qaýpi jáne olardy qaǵaz túrinde usyný qajettiligi joq. Bul derekter qyzmetkerdiń jeke is servisin qalyptastyrý kezinde de paidalanylady. Sonymen qatar, júieni paidalaný – qyzmetker men jumys berýshi arasyndaǵy eńbek qatynastarynyń ashyqtyǵynyń kepili», – dep atap ótti Baqtiiar Jazyqpaev.
Qazirgi ýaqytta E-hr júiesi pasporttyq jáne mekenjai derekterin alý bóliginde jeke tulǵalardyń memlekettik derekqormen, sondai-aq bilim týraly málimetterdi alý bóliginde ulttyq bilim derekqorymen biriktirilgen. Alynatyn aqparat, sondai-aq jeke is qalyptastyrý úshin paidalanylady.
Esterińizge sala keteiik, qazirgi ýaqytta «Elektrondyq úkimet» portalynyń jeke kabinetinde, sondai-aq Smart Astana qosymshasy arqyly E-hr arqyly tirkelgen eńbek sharttaryn kórýge bolady.
Eńbekmininde eńbek zańnamasyna E-hr júiesin engizý jáne qoldaný jónindegi túzetýler ázirlendi. Qazirgi ýaqytta zań jobasy QR Parlamenti Májilisinde maquldandy jáne Senattyń qaraýynda. Túzetýler 2020 jyldyń maýsymynan bastap zańdy kúshine enedi dep josparlanǵan.
