Qazaqstandyq dziýdoshy Karina Tákieva Livan astanasy Beirýtta dziýdodan márege jetken Aziia chempionatynda jeńimpaz atandy, dep habarlaidy QazAqparat .
BQO dene shynyqtyrý jáne sport basqarmasy málim etkenindei, Karina asa aýyr salmaqta (+78 kg) top jardy.
Karina Rýslanqyzy 2003 jyly Oral qalasynda dúniege kelgen. Dziýdo álippesin jekpe-jek sporty túrlerinen olimpiada rezervi mamandandyrylǵan balalar men jasóspirimder mektebinde jattyqtyrýshy Azamat Qapsatovtan úirendi.
Qazirgi kezde Almatydaǵy respýblikalyq sport kolledjiniń 2 kýrs stýdenti. Bapkeri – Jaidar Sailaýbaev.
2021 jyl Karina úshin tabysty jyl boldy. QR V jastar sport oiyndary men 23 jasqa deiingiler arasynda el birinshiliginde kúmis júldemen marapattalsa, eresekter arasyndaǵy Qazaqstan chempionatynda úzdik úshtikke ilikti.
Qazaqstan dziýdo federatsiiasynyń málimetine qaraǵanda, jarystyń sońǵy kúni sondai-aq Maksim Meiirlan 81 kelige deiingi salmaqta qola júldege ie boldy.
Osylaisha Qazaqstan jastar uldar quramasy (aǵa jattyqtyrýshylary Azamat Muqanov pen Aibek Imashev) Aziia chempionatyn 2 altyn, 1 qola, qyzdar (aǵa bapkerler Hatip Arsen, Nurbek Myqtybekov) 1 altyn, 1 kúmis jáne 4 qola medalmen aiaqtady.
