Dziýdodan erlerdiń QR ulttyq qurama komandasynyń bas bapkeri Ǵalymjan Jylgeldiev Tokio Olimpiadasyna qatysatyn sportshylar tizimin jariialady, dep habarlaidy "Ult aqparat" Olympic.kz saityna silteme jasap.
«Dziýdodan Tokio Olimpiadasyna baratyn quram búginde belgili. Osyǵan deiin aitqanymyzdai, Olimpiada oiyndaryna Olimpiadalyq reitingide joǵary orynda turǵan sportshy barady. Qazirgi tańda Qazaqstan erler quramasynyń 7 sportshysy reitingide tiisti upaidy jinady. Alaida ár salmaqtan bir sportshy ǵana qatysa alatyndyqtan, biz aldyńǵy qatarda turǵan sportshyǵa múmkindik bergendi qup kórdik.
Álem chempionatyna deiin ulttyq quramanyń bapkerleri aqyldasyp, 60 kelide Ǵusman Qyrǵyzbaevty álem birinshiligine, al Eldos Smetovti Olimpiada oiyndaryna daiyndaǵandy jón sanadyq. Eki sportshymyzdy eki mańyzdy jarysqa arnaiy daiyndadyq. Ǵusman Qyrǵyzbaev Býdapeshte úmitimizdi aqtap, álem chempionatynyń kúmis júldesine ie boldy.
Al 66 kelide Eldos Jumaqanov pen Erlan Serikjanovtyń arasyndaǵy báseke óte tartysty júrdi. Bes jylǵa sozylǵan olimpiadalyq tsiklde eki dziýdoshyǵa birdei múmkindik berilip, álemdik jarystarǵa qatar shyqty. Álem chempionatynyń aldynda dál osy salmaq boiynsha da bapkerlermen aqyldasyp, Tokioǵa baratyn sportshy álem chempionatynan keiin belgili bolady dep tarqasqanbyz. Ózderińiz kórgendei, Eldos Jumaqanov álem birinshiliginiń jartylai finalyna deiin jetip, jarysta besinshi boldy. Júldegerler qatarynan kóringende, sózsiz, Eldos olimpiadalyq reitingide aldyńǵy qatarǵa shyǵatyn edi. Alaida, jaraqatyna bailanysty ol jartylai finalda toqtady.
Qazirgi tańda 66 kelide Erlan Serikjanov reitingide joǵary tur. Sondyqtan osy salmaq boiynsha Erlan Serikjanov Tokio Olimpiadasynda el namysyn qorǵaidy.
Al qalǵan salmaqtar boiynsha reitingide tiisti upai enshilegen balýandar Tokioǵa attanady.
73 kelige deiingi salmaq dárejesinde Jansai Smaǵulov, 90 kelide Islam BozbaevOlimpiada oiyndaryna qatysady. 81 kelige deiingi salmaq dárejesinde Didar Hamza qurlyqtyq kvotaǵa ie boldy.
Osylaisha, Tokio Olimpiadasyna erler quramasynan jalpy sany 5 dziýdoshy qatysady. Olar: Eldos Smetov (60 kg), Erlan Serikjanov (66 kg), Jansai Smaǵulov(73 kg), Didar Hamza (81 kg) jáne Islam Bozbaev (90 kg)», - deidi dziýdodan Qazaqstan ulttyq qurama komandasynyń bas bapkeri Ǵalymjan Jylgeldiev.
