AQSh biznesmeni jáne filantrop, "Ashyq qoǵam" qorynyń negizin salýshy Djordj Soros Dúniejúzilik ekonomikalyq forýmdaǵy sózinde Vladimir Pýtinge Ýkraina jerinde tezirek soqqy berýge shaqyrdy. Onyń sózinshe, "bul – órkenietti qorǵap qalýdyń eń durys joly jáne jalǵyz múmkindigi bolýy múmkin", dep jazady Azattyq.
Soros Ýkrainadaǵy soǵysty "Batys elderiniń "ashyq qoǵamy" jáne Resei men Qytai siiaqty elder kiretin "jabyq qoǵam" arasyndaǵy qaqtyǵystan týatyn Úshinshi dúniejúzilik soǵystyń bastaýy bolýy múmkin" dep sipattady.
"Memleket ashyq qoǵamda jeke adamnyń bostandyǵyn qorǵaidy, jabyq qoǵamda jeke adamdy óziniń múddesine qyzmet etkizedi" deidi Soros.
Biznesmenniń oiynsha, keiingi 20 jylda álemde avtoritarlyq tendentsiia kúsheigen, óitkeni "jabyq qoǵam" qazirgi zamanǵy tehnologiiaǵa qyzmet ete bastaǵan.
Djordj Sorostyń pikirine qaraǵanda, "adamzattyń aldynda turǵan ózge problemanyń bári, mysaly, klimat ózgerisine bailanysty problema da keiinge ysyrylyp qalǵan. Áitpese tek avtoritarlyq tendentsiialar ǵana emes, klimat ózgerisi de álemdik órkenietke úlken kesirin tigizedi".
Sorostyń pikirinshe, Qytai Vladimir Pýtinniń soǵysqa daiyndalyp jatqanyn bilgen. Onyń sózinshe, "Pýtin Ýkrainanyń orystildi halqy Resei áskeriniń aldynan gúl alyp shyǵady" dep eseptegen, biraq olai bolmaǵan. Kiev túbindegi jeńilisten soń Pýtin jospary ózgergen". Soros Býcha qyrǵynyn eske alyp, Mariýpoldi qorshaýǵa general Vladimir Shamanov jetekshilik etti degen boljam aitty (biraq onyń nege súiengeni belgisiz). Sorostyń oiynsha, qazir soǵys Resei áskeriniń kóptigi yqpal etetindei jaǵdaida tur, biraq Ýkrainanyń qarsylyq kórsetetin múmkindigi bar.
Sorostyń aitýynsha, Vladimir Pýtin esebinen jańylǵanyn qazirdiń ózinde túsingen, endi kelisim izdei bastaýy múmkin, biraq qazirgi jaǵdaida onymen kelisimge kelý múmkin emes, óitkeni "Pýtinge senim joq".
Davostaǵy forým biyl alǵash ret kóp jyldan beri Resei ókilderinsiz ótip jatyr. Forýmdaǵy negizgi taqyryptardyń biri – Ýkrainadaǵy soǵys. Forým jumysyna Ýkraina prezidenti Vladimir Zelenskii videobailanyspen qatysyp otyr. Sársenbi kúni ol Máskeýmen beibit kelissóz múmkindigi jaily oi-pikirin taǵy da aitty. Ýkraina prezidentiniń sózinshe, Resei áskeri 24 aqpandaǵy ornyna sheginse ǵana, Pýtinmen kelissózge otyrýy múmkin.
Resei biligi men kremlshil kommentatorlar Sorosty Reseige zarar keltirýdi kózdeitin "rýsofob" dep esepteidi. Soros qory Reseide 1990 - 2000 jyldar arasynda jumys istegen. Onyń "Ashyq qoǵamy" Reseide "kereksiz uiym" dep tanylǵan.
